नयाँ दिल्ली । मूल प्रवाह अखिल भारत नेपाली एकता समाजले भारतको हिमाञ्चलमा कार्यरत नेपालीलाई त्यहाँका भारतीय नागरिक सरह व्यवहार गर्न माग गरेको छ । मूल प्रवाहको नेतृत्वमा कुल्लु मनाली जिल्लाका नेपालीहरूले हिमाञ्चल प्रदेशका मुख्यमन्त्री जयराम ठाकुरलाई ज्ञापन पत्र बुझाउँदै भारतीय नागरिक सरहका समान व्यवहार र हक अधिकार उपलब्धताको माग गरेका हुन् ।
मूल प्रवाका नेता साँइला लामा नेतृत्वको टोलीले मुख्यमन्त्री ठाकुरसँग स्वास्थ्य, शिक्षा, रोजगारी, पारिश्रमिक, सुरक्षालगायतका विषयमा नेपालीलाई अधिकार दिन माग गरेको हो ।
हिमाञ्चल प्रदेशको आर्थिक उन्नति र प्रगतिमा नेपालीहरुको ठूलो भूमिका छ भन्दै उहाँले नेपालीले पाउनु पर्ने सेवा, सुविधा र सम्मानका विषयमा कुरा राखेको जानकारी दिनुभयो ।
उहाँका अनुसार सडक, खानेपानी, वन लगायतका सरकारी निकायमा २ हजार जति नेपालीहरु स्थायी जागिरे नै छन् । त्यसबाहेक स्याउ खेती, पशुपालन र अन्य कृषिकर्म गर्नेहरुको संख्या ठूलो छ । अधिकांश नेपालीहरु मजदुर छन् ।
कुल्लु मनालीको सडक विभागमा १६ वर्षदेखि दैनिक ज्यालादारीमा कार्यरत २० जनालाई स्थायी गर्न पनि मुख्यमन्त्रीको ध्यानाकर्षण गराइएको लामाले बताउनुभयो । मुख्यमन्त्री ठाकुरले नेपालीहरुको सम्मान, सुरक्षा र सुविधामा कुनै पनि असमानता हुन नदिने प्रतिबद्धता व्यक्त गरेको लामाले जानकारी दिनुभयो ।
