काठमाडौं । जनवादी गायक जेबी टुहुरे गम्भीर बिरामी पर्नुभएको छ । उहाँको बल्खुस्थित बयोधा अस्पतालको सीसीयू कक्षमा उपचार भइरहेको परिवारजनले बताएका छन् ।
परिवारजनका अनुसार ७६ वर्षीय टुहुरे हिजो (मंगलबार) दिउँसो घर (कलंकी) मै अचानक बेहोस भएर लडेपछि उहाँलाई अस्पताल भर्ना गरिएको हो । उपचारमा संलग्न चिकित्सकका अनुसार उहाँलाई ‘स्ट्रोक’ भएको हो ।
२०२४ सालदेखि सांगीतिक क्षेत्रमा प्रवेश गरेका टुहुरेको वास्तविक नाम जुठबहादुर खड्गी हो । उहाँले डेढ सयभन्दा बढी प्रगतिशील गीत गाउनुभएको छ ।
टुहुरेको सबैभन्दा चर्चित गीत हो– ‘आमा दिदीबहिनी हो, कति बस्छौ दासी भई, सुखको सधैं प्यासी बनेर’। यस्तै ‘बसाइँ हिँड्नको ताँतीले बस्नेको मन रुँद छ, लाखौंको लागि उजाड छ यो देश मुठ्ठीभरलाई त स्वर्ग छ’ बोलको गीत पनि निकै चर्चित छ ।
सुनसरीको धरान घर भएका टुहुरे दोस्रो संविधान सभामा तत्कालीन एकीकृत नेकपा (माओवादी)बाट समानुपातिक सभासदसमेत बन्नुभएको थियो ।
