काठमाडौँ । अखिल नेपाल प्रगतिशील लेखक सङ्घ (अन्पा) ले “नेपाली प्रगतिवादी साहित्यमा नारी हस्ताक्षर” विषयमा दशौँ मासिक कार्यक्रम सम्पन्न गरेको छ । २०७८ साउन ३२ गते भर्चुअल माध्यमबाट उक्त कार्यक्रम सम्पन्न भएको हो ।
र्यक्रममा प्रगतिशील लेखक सङ्घकी केन्द्रीय सल्लाहकार डा. विन्दु शर्माले विषयवस्तु प्रस्तुत गर्नुभएको थियो ।
सो अवसरमा उहाँले २००६ सालदेखि अर्थात् नेपाल कम्युनिस्ट पार्टीको स्थापना र कम्युनिस्ट घोषणापत्रको नेपालीमा अनुवाद भएसँगै नेपालमा प्रगतिवादी साहित्य लेखन अगाडि बढेको बताउनुभयो ।
‘सामन्तवाद तथा साम्राज्यवाद विरोधी चेतनासँगै नेपालमा प्रगतिवादी साहित्य सुरु भयो’ उहाँको भनाइ थियो ।
मन्तव्यको क्रममा प्रगतिवादी साहित्यमा नारी हस्ताक्षरको सन्दर्भमा पारिजातलाई शीर्षस्थानमा राख्नुपर्ने उहाँको धारणा थियो ।
‘पारिजात दार्जिलिङबाट नेपाल नआएको भए नेपालको प्रगतिवादी लेखनमा महिलाको भूमिका के हुन्थ्यो होला ?’ डा. शर्माले अगाडि भन्नुभयो– ‘प्रगतिवादी महिला लेखनमा पारिजात सबै विधानमा उच्च स्थानमा रहनुभयो ।
उहाँले तफसिलमा व्याख्या गर्दै आख्यान, कविता, निबन्ध, नाटक र समालोचना सबै क्षेत्रमा पारिजातको भूमिका सबैभन्दा माथि भएको बताउनुभयो ।
‘प्रगतिवादी महिला लेखनमा महिला उत्पीडनको मात्रै नभएर वर्गीय उत्पीडनको पनि विरोध गरिएको छ’ डा. शर्माले प्रगतिवादी महिला लेखनको सार खिच्नुभयो ।
कविता विधाले साहित्यको नेतृत्व गरिरहेको बताउँदै उहाँले महिलाहरू अहिले त झन् सशक्त अवस्थामा आइपुगेको दाबी गर्नुभयो ।
उहाँले साहित्यमा धेरै लेख्नेभन्दा पनि हस्तक्षेपकारी ढङ्गले लेख्न सके अर्थात् सकेसम्म प्रतिधु्रवलाई निस्तेज पार्ने, नभए टक्करसम्म दिने गरी साहित्य रचना गर्नुपर्ने आवश्यकतामा ध्यान दिन आग्रह गर्नुभयो ।
महिला साहित्यकार परिमाणमा भन्दा पनि गुणमा स्तरीय भएको उहाँको भनाइ थियो ।
उहाँले नेपाली साहित्यमा शिल्पकलामा नयाँपन नदेखिनु चिन्ताको विषय भएको पनि बताउनुभयो ।
अन्पाका महासचिव तथा प्रगतिवादी साहित्यकार रामप्रकाश पुरीले समेत मन्तव्य राख्नुभएको उक्त कार्यक्रममा प्रगतिशील लेखक सङ्घका महासचिव समीर सिंह, साहित्यकारहरू पूर्ण ओली र मुकुन्दप्रसाद शर्माको आतिथ्यता रहेको थियो ।
अन्पाका अध्यक्ष डा. गोविन्दप्रसाद आचार्यको अध्यक्षतामा अघि बढेको कार्यक्रमको सञ्चालन सचिव गिरीप्रसाद बुढामगरले र स्वागत मन्तव्य कोषाध्यक्ष प्रकाश थापामगरले गर्नुभएको थियो ।
कार्यक्रममा जगत् वाशिष्ठले पूरक मन्तव्य राख्नुभएको थियो ।
सो अवसरमा ऋतु केसीले “ऊ र एउटा प्रण”, समष्टि बुढाले “सपनाको सहर”, पिताम्बर भट्टराईले “हँसिया–हथौँडा”, मुकुन्दप्रसाद शर्माले “मानव”, वासुदेव ज्ञवालीले “बिरामीको सेवा” तथा बाबुराम आचार्य, कमला बगाले, नारायण ज्ञवाली र गिरीप्रसाद बुढाले तिजगीत प्रस्तुत गर्नुभएको थियो ।
