काठमाडौँ । नेपाल क्यान्सर सर्भाइबर सोसाइटीको साधारण सभा तथा अन्तरक्रिया कार्यक्रम सम्पन्न भएको छ । प्रमिता खनालको अध्यक्षतामा नयाँ कार्यसमिति चयन गर्दै २०७८ साउन ३० गते तीनकुनेस्थित मेट्रो आँखा अस्पतालको हलमा सो कार्यक्रम सम्पन्न भएको हो ।
प्रमिता खनालको अध्यक्षता तथा प्रमिला केसीको संचालनमा अगाडि बढेको सो साधारण सभामा अध्यक्ष खनालले प्रगति प्रतिवेदन तथा कोषाध्यक्ष बिनु केसीले आर्थिक प्रतिवेदन प्रस्तुत गरी पारित गरिएको थियो ।
साधारण सभापछिको अन्तरक्रिया कार्यक्रमका विशिष्ट अतिथिमा मेडिकल अन्कोलोजिस्ट डा. अरुण शाही तथा मनोसामाजिक सल्लाहकार कपिल शर्मा हुनुहुन्थ्यो ।
कार्यक्रममा धारणा राख्दै डा. शाहीले ‘पुरुषको तुलनामा महिला नै क्यान्सर रोगबाट पीडित हुने गरेको बताउँदै विशेष गरी महिला, छोराछोरी र घरपरिवार स्वास्थ्यप्रति हेलचेक्र्याइँ गर्दा यो रोग जटिल बन्दै गएको बताउनुभयो । क्यान्सर रोग लागेपछि उच्च मनोबलका साथ डक्टरसमेतको सल्लाहअनुसार नियमित फलोअपमा रहिरहनुपर्ने उहाँको धारणा थियो ।
अन्तरक्रियामा धारणा राख्दै मनोसामाजिक सल्लाहकार कपिल शर्माले कुनै पनि व्यक्ति शारीरिक रूपमा जति स्वस्थ हुन आवश्यक छ, मानसिक रूपमा पनि त्यति नै स्वस्थ हुन आवश्यक रहेको बताउनुभयो । मानसिक रूपमा कमजोर हुँदा पनि विभिन्न रोगले आक्रमण गर्न सहज हुने हुँदा उच्च मनोबलका साथ अगाडि बढ्नुपर्ने उहाँको तर्क थियो ।
संस्थाकी कोषाध्यक्ष बिनु केसीका अनुसार क्यान्सर विजेता तथा क्यान्सरसित जुधिरहेकालाई लक्षित गरी सो संस्था गठन गरिएको हो । उक्त संस्थाले आर्थिक रूपमा कमजोर क्यान्सर बिरामीलाई आर्थिक सहयोग गर्नेदेखि लिएर क्यान्सर बिरामीलाई सकारात्मक सल्लाह, डाक्टरसँग अन्तरक्रिया, स्कुलकलेजमा स्क्रिनिङलगायत स्यास्थ्यसम्बन्धी सचेतनामूलक कार्यक्रम गर्दै आएको पनि जानकारी दिएको छ ।
