भद्रपुर । खोपको माग गर्दै झापाको सुरुङ्गादेखि झापाबजार जोड्ने अमरपथ सडक खण्डको निर्माण २०७८ साउन २१ गतेदेखि अनिश्चित कालका लागि बन्द गरिएको छ ।
कनकाई इन्टरनेसनल विल्डर्समा कार्यरत मजदुर कर्मचारीले कोरोना विरुद्धको खोप लगाउन माग गर्दै सडक निर्माण बन्द गरेका हुन् ।
ठेकेदार कम्पनीका प्रतिनिधि लीला सेलुवालले कोरोनाको जोखिम बढेपछि काम बन्द गरिएको जानकारी दिनुभयो । उहाँले भन्नुभयो– ‘खोप नलगाएसम्म जोखिम मोलेर काम गर्न सकिँदैन ।’ खोपका लागि मजदुर कर्मचारीको नामावलीसहित कनकाई नगरपालिकामा निवेदनसमेत पेस गरिएको उहाँले जानकारी दिनुभयो ।
सो सडक खण्डको निर्माणमा १३० मजदुर कर्मचारी नियमित काम गरिरहेका छन् । करिब १० महिनाअघि प्रदेश नं १ का मुख्यमन्त्री शेरधन राईले अमरपथ सडक खण्डको शिलान्यास गर्नुभएको थियो । उक्त सडकको लम्बाइ सुरुङदेखि भारतको सीमा नाका डिगल बैंकसम्म २४ किलोमिटर छ ।
पूर्वाधार विकास कार्यालयबाट निर्माण हुन लागेको सडकको लागत रु एक अर्ब चार करोड रहेको छ । दुई खण्डमा निर्माण हुन लागेको पहिलो खण्ड ७ दशमलव ८ किलोमिटरको रु ४७ करोडमा कनकाई आशिष जेभी र दोस्रो १८ किलोमिटर सडकखण्डको तुँदी रोशन मैनाचुली जेभीले रु ५७ करोडमा लिएको छ ।
२०७६ भदौ १६ गते ठेक्का सम्झौता भएको उक्त सडकको निर्माण कम्पनीले २०८० भदौ १५ गतेभित्र गरिसक्नुपर्ने छ ।
