काठमाडौं । अनियमिततामा मुछिएका विपी कोइराला स्वास्थ्य विज्ञान प्रतिष्ठान धरानका उपकूलपतिसहितका पदाधिकारी पदमुक्त हुने भएका छन् । प्रतिष्ठान शुद्धीकरण अभियान र स्वास्थ्य मन्त्रालयबीच पदाधिकारीलाई पदमुक्त गर्ने सहमति भएको हो ।
स्वास्थ्य मन्त्रालयका प्रवक्ता डा. कृष्णप्रसाद पौडेललगायत तीन सदस्यीय टोली र संघर्ष समिति संयोजक डा. एसपी रिमालले ६ बुँदे सहमति पत्रमा हस्ताक्षर गर्नुभएको छ । सहमतिमा अभियानले माग गरेबमोजिम प्रतिष्ठानका उपकुलपति डा. ज्ञानेन्द्र गिरीसहित ४ जना पदाधिकारीलाई हटाउन आजैबाट प्रक्रिया सुरु गरिने उल्लेख छ ।
प्रतिष्ठान शुद्धीकरण अभियानले उपकुलपति ज्ञानेन्द्र गिरी, रेक्टर गुरुप्रसाद खनाल, रजिस्ट्रार मोहनचन्द्र रेग्मी र अस्पताल निर्देशक गौरीशंकर साहले अनियमितता गरेको आरोप लगाउँदै उनीहरुलाई पदबाट हटाई छानबिन गर्नुपर्ने माग राखेको थियो।
सहमतिसँगै संघर्ष समितिले अस्पतालमा रोकेका सेवाहरु सुरु गर्ने भएको छ। संघर्ष समितिमा आवद्ध चिकित्सकसहितका स्वास्थ्यकर्मीले आकष्मिकबाहेकका सबै सेवा बहिष्कार गरेर आन्दोलित भएका थिए।
