काठमाडौं । नेपालमा हालसम्म ३४ लाख नागरिकले कोरोनाविरुद्ध खोपको पहिलो डोज लगाएका छन् भने १४ लाख ३० हजार भन्दा बढीले दुवै डोज लगाएका छन् । सोमबार प्रतिनिधि सभा अन्र्तगतको शिक्षा तथा स्वास्थ्य समितिमा सो जानकारी दिइएको हो ।
स्वास्थ्य मन्त्रालय अन्र्तगत स्वास्थ्य आपतकालीन केन्द्रका संयोजक डा. गुणराज लोहनीले हालसम्म कोभिड–१९ विरुद्धको खोपको पहिलो मात्रा ३४ लाख ५ हजार १ सय ५४ जनालाई लगाइएको र १४ लाख ३० हजार ४ सय १६ जनालाई दुवै मात्रा खोप लगाइएको बताउनुभयो । उहाँले वैदेशिक अनुदानमा चीन सरकारबाट १८ लाख र भारत सरकारबाट ११ लाख मात्रा खोप आएको तथा हालसम्म ५० लाख मात्रा खरिद गरिएको पनि उहाँले जानकारी दिनुभयो ।
त्यसमध्ये भारतबाट १० लाख मात्रा कोभिशिल्ड र चीनबाट ३२ लाख मात्रा भेरोसेल खोप किनिएको उहाँले स्पष्ट पार्नुभयो । आउन बाँकी ८ लाख खोप शुक्रबार नेपाल आईपुग्ने पनि उहाँले बताउनुभयो । उहाँले असोज मसान्त भित्र थप १ करोड ५ लाख ४८ हजार मात्रा खोप कोभ्याक्स सुविधा अन्तर्गत, वैदेशिक अनुदान र खरिदमार्फत् नेपाल आउने पनि बताउनुभयो ।
यस्तै, स्वास्थ्य सचिव लक्ष्मण अर्यालले चैत महिनासम्ममा २ करोड १५ लाखलाई खोप उपलब्ध गराउने रोडम्यापको आधारमा काम गरिरहेको बताउनुभयो । आवश्यक खोप किन्नको लागि प्रक्रिया अगाडि बढिरहेको पनि उहाँले जानकारी दिनुभयो ।
बैठकमा स्वास्थ्य तथा जनसंख्या राज्यमन्त्री उमेश श्रेष्ठले सरकारको पहिलो प्राथमिकता कोभिड १९ विरुद्धको खोप उपलब्ध गराउने बताउनुभएको थियो । राज्यमन्त्री श्रेष्ठले सरकारको प्राथमिकता कोभिड १९ विरुद्धको खोप उपलब्धता गराउने भएकाले अनुदान, ऋण अथवा किनेरै भएपनि सबै नेपालीलाई खोप उपलब्ध गराइने बताउनुभयो । उहाँले आइतबार एडिबी र विश्वबैंकसँग ऋण लिनका लागि हस्ताक्षर गरेको पनि जानकारी दिनुभयो ।
उहाँले भन्नुभयो – ‘अहिलेको पहिलो प्राथमिकता भनेको सबै जनमानसहरुलाई, ६० प्रतिशत जनमानसलाई खोप लगाउन सकियो भने राम्रो हुन्छ भनेर त्यो खोप ल्याउने । हिजो भर्खरै मैले एउटा साइन गरेको छु एडिबी र वल्र्ड बैंकबाट सर्टेन ऋण लिने भनेर । त्यसको अलावा हामीले किनेर, अनुदानमा ल्याउँ चाँडोभन्दा चाँडो खोप ल्याएर खोपको व्यवस्थापन गर्नु जरुरी छ ।’
