काठमाडौँ । नेपालमा निषेधाज्ञा खुकुलो भएयता कोरोना सङ्क्रमितको सङ्ख्या दैनिक बढिरहेको छ । पछिल्लो करिब दुई हप्तादेखि सङ्क्रमणमुक्त हुने भन्दा सङ्क्रमितको सङ्ख्या पनि धेरै देखिएको छ ।
गएको २४ घण्टामा नेपालमा दुई हजार ९०५ जनामा कोरोना भाइरसको सङ्क्रमण पुष्टि भएको छ । स्वास्थ्य तथा जनसङ्ख्या मन्त्रालयले बुधबार गरेको नियमत प्रेस ब्रिफिङका क्रममा सो सो सङ्ख्यामा सङ्क्रमित भेटिएको जानकारी दिएको हो । यो अवधिमा १३ हजार २४ जनाको परीक्षण गरिएको थियो ।
यस्तै, बुधबार एक हजार छ सय छ जना सङ्क्रमणमुक्त भएका छन् भने १८ जनाको निधन भएको छ । योसहित हालसम्म नौ हजार ४३० जनाको ज्यान गएको मन्त्रालयले जनाएको छ ।
बुधबार काठमाडौँ उपत्यकामा ४२५ जना सङ्क्रमित थपिएका छन्, जसमा काठमाडौँ २९४, भक्तपुर ६२ र ललितपुरमा ६९ जनामा सङ्क्रमण पुष्टि भएको छ ।
मङ्गलबार देशभर दुई हजार ३९८ सङ्क्रमित थपिएका थिए भने दुई हजार ७८ निको भएका थिए । १२ जनाको निधन भएको थियो ।
मङ्गलबार काठमाडौं उपत्यकामा काठमाडौँ ४१०, ललितपुर ९७ र भक्तपुरमा ८० जना गरी ५८७ जनामा सङ्क्रमण पुष्टि भएको स्वास्थ्य मन्त्रालयको तथ्याङ्कमा उल्लेख छ ।
