काठमाडौँ । तनहुँ घर भएकी रूपा सुनारले शिक्षा, विज्ञान तथा प्रविधिमन्त्री कृष्णगोपाल श्रेष्ठका विरुद्ध सर्वोच्च अदालतमा रिट दर्ता गराएकी छिन् ।
२०७८ असार २० गते सर्वोच्च अदालतमा शिक्षा, विज्ञान तथा प्रविधिमन्त्री श्रेष्ठको विरुद्धमा रिट दर्ता भएको हो ।
रूपाले रिटमा भनेकी छिन्– ‘जातीय भेदभाव तथा छुवाछ्रूत कसुरको कसुरदारलाई कानुनअनुसार कारबाहीको माग गर्दै संविधान र कानुनले वर्जित जातीय भेदभाव तथा छुवाछूतजस्तो गम्भीर मुद्दाको अपराध अनुसन्धानलाई प्रभावित गरी अदालतबाट म्याद थप भई अनुसन्धानमा रहेका विपक्षीलाई पदीय ओहदा र सरकारी पद तथा स्रोत समेतको दुरूपयोग गरी प्रहरी कार्यालयमै पुगेर अनुसन्धान प्रभावित पारेकाले शिक्षा, विज्ञान तथा प्रविधि मन्त्री श्रेष्ठलाई कारबारी गर्दै प्रहरीमा दिएको जाहेरी तत्काल दर्ता गराइपाऊँ ।’
थरकै कारण कोठा नदिएको भन्दै रूपाले बबरमहलकी घरबेटी सरस्वती प्रधान विरुद्ध प्रहरी कार्यालयमा जाहेरी दिएकी थिइन् । जाहेरीपछि घरबेटीकी बुहारी सरस्वती प्रधान पक्राउसमेत परेकी थिइन् ।
पक्राउ परेकी प्रधानमाथि प्रहरीले तीन दिन हिरासतमा राखेर अनुसन्धान गरेको थियो । अनुसन्धान सकाएर प्रहरीले जिल्ला सरकारी वकिल कार्यालय बुझाएको थियो । तर सरकारी वकिलको कार्यालयले थप अनुसन्धान गर्नू भन्दै प्रहरीलाई निर्देशन दिएको थियो ।
घरबेटी सरस्वती प्रधान भने श्रीमान मुकुन्दको रोहबरमा जमानमा छुटेकी थिइन् । त्यही बेला शिक्षा, विज्ञान तथा प्रविधिमन्त्री श्रेष्ठ सरस्वती प्रधानलाई लिन महानगरीय प्रहरी वृत्त सिंहदरबार पुगेका थिए ।
मन्त्रीले नै पीडकको पक्ष लिएर वृत्त पुगेर लिन गएको र झण्डावाला गाडीमा हालेर घरसम्म पुर्याएको भन्दै रूपा सुनारले सर्वोच्चमा मुद्दा हालेकी हुन् ।
यता, सरस्वती प्रधानले पनि आफु विरुद्ध सुनियोजित प्रकारले षड्यन्त्र भएको भन्दै राष्ट्रिय मानव अधिकार आयोगमा निवेदन दर्ता गराइसकेकी छिन् ।
यस्तो रिटको पूर्ण पाठ (पिडिएफ फर्मेटमा)
