काठमाडौं । नेकपा (मसाल) निकट विभिन्न जनवर्गीय संगठनले भारतीय हस्तक्षेप विरुद्ध सडक संघर्षमा उत्रने तयारी गरेका छन् । भारतीय साम्राज्यवादलाई चुनौति दिन शुक्रबार (कात्तिक २२ गते) काठमाडौंको लैनचौरस्थित भारतीय राजदूताबास अघि प्रदर्शन गर्ने ति संगठनहरुको तयारी छ ।
विभिन्न १२ जनवर्गीय संगठले बिहीबार संयुक्त वक्तव्य प्रकाशित गरी रत्नपार्कदेखि लैनचौरसम्म जुलुश प्रदर्शन गर्ने चेतावनी दिएका हुन् । ति संगठनहरुले कालापानी लगायतका नेपाली भूभागलाई भारतको कब्जा मुक्त गर्न संघर्षमा उत्रन पनि जनतासित अपिल गरेका छन् ।
यस्तो छ संयुक्त वक्तव्यः
“नेपालको कालापानी, लिपुलेक र लिम्पियाधुराको भू–भाग समेटेर भारतले नयाँ नक्सा सार्वजनिक गरेको छ । नेपाली भूमिमाथि निरन्तर कब्जा गर्दै आएको भारतले स्वेच्छाचारी ढंगले एकतर्फी रुपमा त्यसरी नक्सा प्रकाशित गर्नु आपत्तिजनक, खेदप्रद हुनुका साथै नेपालको स्वतन्त्रता, अखण्डता र सार्वभौमिकतामाथिको गम्भीर हमला हो ।
हामी भारतीय साम्राज्यवादद्वारा गरिएको अतिक्रमणको तीव्र शब्दमा भत्र्सना गर्दै उक्त नक्सा खारेज गर्न चेतावनी दिन चाहन्छौं । भारतले अतिक्रमण गरेको भूमि छोड्न र भारतीय सेना फिर्ता गर्न तत्काल ठोस कुटनीतिक कदम चाल्नको लागि नेपाल सरकारसँग जोडदार माग गर्दछौं ।
भारतीय साम्राज्यवादको हस्तक्षेपविरुद्ध नेकपा (मसाल) सम्बद्ध जनवर्गीय संगठनहरुको अगुवाईमा २०७६ कात्तिक २२ गते शुक्रबार काठमाडौंको रत्नपार्कदेखि लैनचौरसम्म विरोध प्रदर्शन आयोजना गरिएको हुँदा उक्त प्रदर्शनमा सहभागी हुन एवं देशव्यापी रुपमा संघर्षमा उत्रिन सम्पूर्ण जनसमुदायमा हार्दिक अपिल गर्दछौं ।”
१. नारायण सापकोटा, अध्यक्ष, अखिल नेपाल ट्रेड युनियन महासंघ (अन्टुक)
२. भक्त विश्वकर्मा, सचिव, अखिल नेपाल युवक संघ
३. मीना पुन, अध्यक्ष, अखिल नेपाल महिला संघ
४. भैरवराज रेग्मी, अध्यक्ष, अखिल नेपाल किसान संघ
५. निमबहादुर बुढा, अध्यक्ष, अखिल नेपाल जनजाति सम्मेलन
६. डा. श्रीधर गौतम, अध्यक्ष, अखिल नेपाल बुद्धिजीवी संघ
७. अधिवक्ता पदम रोका, अध्यक्ष, अखिल नेपाल कानुन व्यवसायी संघ
८. विमल पोखरेल, अध्यक्ष, अखिल (छैठौं)
९. गोपाल बराइली, सदस्य, जातीय समता समाज
१०. हेमराज पुन, सचिव, रक्तिम सांस्कृतिक अभियान
११. बद्रे आलम, अध्यक्ष, तराई मधेश जनवादी मोर्चा
१२.सानोभाई कार्की, अध्यक्ष अखिल नेपाल शिक्षक संघ
विभिन्न ठाउँमा प्रदर्शन
भारतले नेपालको कालापानी लगायतका क्षेत्र समेटेर नयाँ नक्सा सार्वजनिक गरेको विरोधमा अनेरास्ववियु (छैठौं) र अखिल क्रान्तिकारीले कैलालीको अत्तरियामा विरोध प्रदर्शन गरेका छन् । प्रदर्शन पछि अत्तरियामा कोणसभा सम्पन्न भएको छ । कोणसभालाई अखिल (छैंठौ) का केन्द्रीय सदस्य हेमराज भट्ट र अखिल क्रान्तिकारीका केन्द्रीय सदस्य पुष्पराज जोशी लगायतका नेताहरुले सम्बोधन गर्नुभएको थियो ।
यता पाल्पामा पनि अखिल (छैठौं) ले प्रदर्शन गरेको छ । प्रदर्शनपछि आयोजित कोणसभालाई अखिल नेपाल युवक संघ केन्द्रीय अध्यक्ष अनिल किशोर घिमिरे, अखिल (छैठौं) का केन्द्रीय सदस्य एवं पाल्पा जिल्ला अध्यक्ष पुरन पोख्रेललगायतका नेताहरुले सम्बोधन गर्नुभएको थियो ।
