पोखरा । राष्ट्रिय जनमोर्चा गण्डकी प्रदेशका सांसद पियारी थापाले वामपन्थी दलको सरकारलाई दिएको समर्थन फिर्ता लिनुपर्ने अवस्था आउनु दूर्भाग्यपूर्ण भएको बताउनुभएको छ ।
उहाँले सत्ताका लागि राष्ट्रियतामाथि सौदावाजी गरिएको उल्लेख गर्दै प्रदेश सरकार केन्द्र सरकारको प्रतिगामी कदमको गोटी बनेको आरोप लगाउनु भयो ।
बिहीबार मुख्यमन्त्री पृथ्वीसुब्बा गुरुङले संसदबाट विश्वासको मत लिने कार्यक्रमका लागि जारी बैठकमा बोल्दै सांसद थापाले राष्ट्रिय जनमोर्चा प्रदेश सभामा आएको प्रस्तावको विपक्षमा रहेको स्पष्ट पार्नुभयो ।
‘करिब ३ वर्ष अगाडि यो सरकार प्रगतिशील सरकार हो, यसले जनताको पक्षमा काम गर्छ, विधिको सासनको पक्षमा काम गर्छ र संविधान भित्रको राष्ट्रियता, धर्मनिरपेक्षता लगायतको पक्षमा काम गर्छ भनेर यो सरकारको पक्षमा समर्थन दिएका थियौं’ थापाले भन्नुभयो, ‘तर ३ वर्ष नबित्दै यो सरकारबाट संविधानका उपलब्धिहरुलाई खत्तम पार्ने काम भयो । वामपन्थीहरुलाई दिएको समर्थन फिर्ता लिनु के हाम्रो रहर हो ? यसको जिम्मेवार के तपाईहरु हैन ?’
उहाँले अब अहिले आएर रोइकराई गर्नुको अर्थ नरहेको स्पष्ट पाार्नुभयो । जनता रोग र भोकले मरिरहेको बेला सत्ताका लागि जथाभावी नर्ग पनि उहाँले चेतावनी दिनुभयो ।
‘तपाईंहरुको कारण राष्ट्रियता ध्वस्त हुन लाग्यो, विधि पद्धती मिचिन थाल्यो । अहिले राष्ट्रियता सत्ताको लागि सौदावाजी हुँदै छ’ उहाँले भन्नुभयो, ‘यसमा हामीले मनन् गर्ने कि नगर्ने ? यो बिषयमा छलफल गर्ने की नगर्ने ? एउटा भ्युटावर बनाउँदा, एउटा मन्दिर बनाउँदा मानौं कि कुनै चमत्कारी गरेँ भन्नु हुन्छ तर वास्तवमा एउटा सर्वहारावर्ग निमुखा बर्गको लागी केहि गर्नु भयो ? केहि गर्नु भएको छैन ? यहि पोखराको पेतिमा बसेर दैनिक गुजारा चलाउने विपन्न वर्गको लागि काम गर्नुभयो मलाई लाग्छ काम गर्नुभएन ।’
