काठमाडौं । बलात्कार प्रयासको आरोपमा पक्राउ परेका पूर्व सभामुख कृष्णबहादुर महरा पुर्पक्षका लागि कारगार चलान भएका छन् ।
सोमबार भएको थुनछेक बहसपछि काठमाडौं जिल्ला अदालतले उनलाई पुर्पक्षका लागि जेल चलान गर्न आदेश दिएको हो । उनलाई डिल्लीबजारस्थित सदरखोर कारगार पठाइएको छ ।
सोमबार मुख्य न्यायाधीश सुदर्शनराज पाण्डेको इजलासले उनलाई कारागार चलान गर्न आदेश दिएको हो ।महरामाथि संसद् सचिवालयमा कार्यरत महिला कर्मचारी रोशनी शाहीलाई बलात्कार प्रयास गरेको आरोप लागेको छ ।
गत असोज १२ गते राति रोशनीकै कोठामा गएर बलात्कार प्रयास गरेको भन्दै शाहीले एक अनलाइनलाई भिडियो अन्तर्वार्ता दिएपछि घटना सार्वजनिक भएको थियो । बलात्कार प्रयासको आरोप लागेपछि महरालाई गत असोज १९ गते जिल्ला अदालत काठमाडौंले पक्राउका लागि प्रहरीलाई अनुमति दिएको थियो ।
अनुमति पाएसँगै प्रहरीले उनलाई सोही दिन बालुवाटारस्थित सरकारी निवासबाटै पक्राउ गरेको थियो । पक्राउपछि महरा सिंहदरबार वृत्तमा प्रहरी हिरासतमा रहँदै आएका थिए ।
