टेकराज भुसाल, अर्घाखाँची ।
शिक्षाप्रेमी कुलानन्द बन्जाडेको १५ औँ स्मृति दिवसका अवसरमा उहाँको शालिकमा माल्यार्पण गरी सम्मान गरिएको छ । अर्घाखाँचीको भूमिकास्थान नगरपालिका–२ साविक ढाकावाङ्ग ८ अम्लाचौर निवासी शिक्षाप्रेमी तथा समाजसेवी बन्जाडेको सम्मानमा आइतबारविभिन्न कार्यक्रम गरिएको हो ।

नेपालको वाम–लोकतान्त्रिक आन्दोलनका कर्मठ योद्धा, शिक्षक आन्दोलनका अग्रज, नेपाल राष्ट्रिय शिक्षक संगठनका पूर्व केन्द्रीय उपाध्यक्ष तथा शिक्षाप्रेमी, समाजसेवी, विश्व माध्यमिक विद्यालय ढाकावाङ्गका तत्कालीन प्रधानाध्यापक स्वर्गीय बन्जाडेको १५ औं पुन्य तिथिमा स्वर्गीय बन्जाडेको शालिकमा टीका तथा माल्यार्पण गरि मनाइएको छ।

कार्यक्रममा राष्ट्रिय जनमोर्चाका नेता तथा अखिल नेपाल खेलकुद महासंघका केन्द्रीय संयोजक पृथ्वी थापा, स्वर्गीय कुलानन्द बन्जाडे स्मृति प्रतिष्ठानका अध्यक्ष खडका बहादुर थापा, उपाध्यक्ष भुवानन्द भुसाल, सचिव खुविराम खनाल भुमिकास्थान नगरपालिका १ नम्बर वडाका वडाध्यक्ष भोजराज खनाल, २ नम्बर वडाका वडा अध्यक्ष बुद्धि बहादुर थापा, अखिल नेपाल शिक्षक संघका प्रतिनिधि रामप्रसाद खनाल, हिमलाल खनाल, अखिल (छैठौं) का नेता टेकराज भुसाल र स्वर्गीय बन्जाडेका आफन्त तथा स्थानीयको उपस्थिति रहेको थियो ।

बिगतका वर्षमा भूमिकास्थान नगरपालिका वडा नम्बर १ र २ भित्रका विद्यालयहरुबाट अन्तिम परीक्षामा उत्कृष्ट अंक ल्याउने बिभिन्न विद्यालयका एक÷एक जना छात्रछात्रा हरुलाई पुरस्कार वितरण गर्ने गरिएकोमा यस वर्ष कोभिडका कारण स्थगित गरिएको छ । सो कार्यक्रमलाई आगामी वर्षहरुमा भने नियमित सञ्चालन गर्ने प्रतिष्ठानका उपाध्यक्ष भुवानन्द भुसालले जानकारी दिनुभएको छ।