खलङ्गा । प्युठानका शिक्षकहरू कोभिड विरुद्धको खोप उपलब्ध नहुँदासम्म विद्यालयमा उपस्थित नहुने भएका छन् ।
नेपाल शिक्षक महासङ्घ जिल्ला समिति प्युठानले २०७८ जेठ १३ गते जिल्ला कोभिड सङ्कट व्यवस्थापन केन्द्र प्युठानलाई ध्यानाकर्षण पत्र बुझाउँदै यस्तो जानकारी गराएको छ ।
शिक्षक महासङ्घ प्युठानका अध्यक्ष शेरबहादुर थापाक्षेत्रीको हस्ताक्षरमा बुझाइएको ध्यानाकर्षण पत्रमा यस्तो निर्णय गरिएको उल्लेख हो ।
ध्यानाकर्षण पत्रको पूर्ण पाठ यस्तो छ–
“प्रस्तुत विषयमा कोभिड–१९ का कारण देशभर सयौँ शिक्षक तथा विद्यालय कर्मचारीको मृत्यु हुनु, हजारौँ सङ्क्रमित हुनु र प्युठान जिल्लामा पनि धेरै शिक्षक तथा विद्यालय कर्मचारी सङ्क्रमित हुनुको कारण शिक्षक तथा विद्यालय कर्मचारीले कोभिड विरुद्धको खोप नपाउनु नै रहेको र प्युठान जिल्लाका कतिपय पालिकाले विद्यार्थीको मूल्याङ्कन जेठ मसान्तभित्र सम्पन्न गर्ने भनी सूचना जारी गरिएता पनि हालको जोखिमपूर्ण अवस्थामा विद्यालयमा उपस्थित भई काम गर्ने वातावरण नरहेकाले नेपाल शिक्षक महासङ्घ राष्ट्रिय समिति र प्रदेश समितिको निर्णय तथा २०७८ जेठ ११ गते बसेको नेपाल शिक्षक महासङ्घ जिल्ला समिति प्युठानको बैठकको निर्णयानुसार कोभिड विरुद्धको खोप उपलब्ध नहुँदासम्म प्युठानका जिल्लाभरका कुनै पनि शिक्षक तथा विद्यालय कर्मचारी विद्यालयमा उपस्थित नहुने निर्णय गरेकाले यथासक्य छिटो खोपको व्यवस्था गरी विद्यालय जाने वातावरण तयार गर्न अनुरोध छ ।”
