काठमाडौं । संसद सचिवालयकी एक कर्मचारीमाथि ‘बलात्कार प्रयास’ गरेको आरोपमा मुद्दा खेपेका पूर्व सभामुख कृष्णबहादुर महराको पक्षमा बहस गर्न २० जना कानुन व्यवसायीहरु तयार भएका छन् । महरा विरुद्ध काठमाडौं जिल्ला अदालतमा मुद्दा जारी छ ।
महराको पक्षमा बहस गर्न पूर्व महान्यायाधिवक्ता रमण श्रेष्ठ तथा वरिष्ठ अधिवक्ता तथा नेपाल बारका पूर्व अध्यक्ष शेर बहादुर केसी तयार भएका छन् । यस्तै, वरिष्ठ अधिवक्ताहरु लवप्रसाद मैनाली, कृष्णप्रसाद सापकोटा, सबिता भण्डारी बराल, अधिवक्ताहरु मनिषकुमार श्रेष्ठ, मुरारीप्रसाद सापकोटा, रामकुमार आचार्य, नरेश खड्का, चन्द्र प्रसाद गुरागाईले पनि वकालतनामा पेश गरेका छन् ।
यता, वादी नेपाल सरकारको तर्फबाट ४ जनाले बहस गर्नेछन् । जिल्ला सरकारी वकिल कार्यालय काठमाडौंका सह न्यायाधिवक्ता चन्द्रकान्त खनालका अनुसार नेपाल सरकारको तर्फबाट सह न्यायाधिवक्ता चन्द्रकान्त खनाल, जिल्ला न्यायाधिवक्ताद्वय उमाकान्त पौडेल र हरिप्रसाद रेग्मी तथा सहायक जिल्ला न्यायाधिवक्ता सिर्जना ढकालले बहस गर्ने जिल्ला अदालत स्रोतले जनाएको छ ।
महराविरुद्ध थुनछेक बहस काठमाडौं जिल्ला अदालतमा आज सुरु हुँदैछ ।
