काठमाडौँ । प्रगतिशील कवि तथा समालोचक प्रा. राजेन्द्र सुवेदी र भारतीय इतिहासकार लालबहादुर वर्माको निधनप्रति अखिल नेपाल प्रगतिशील लेखक सङ्घ (अन्पा) ले श्रद्धाञ्जली अर्पण गरेको छ ।
कवि तथा समालोचक सुवेदी र इतिहासकार वर्मा दुवैको कोरोना सङ्क्रमणका कारण असामयि निधन भएपछि अन्पाले श्रद्धाञ्जली तथा सन्तप्त परिवारप्रति समवेदना व्यक्त गरेको हो ।
अन्पाका अध्यक्ष डा. गोविन्द आचार्यको हस्ताक्षरमा २०७८ जेठ ३ गते जारी शोकवक्तव्यमा भनिएको छ–
“प्रगतिशील कवि तथा समालोक प्रा. राजेन्द्र सुवेदीको कोरोनाका सङ्क्रमणको कारण भएको निधनबाट अखिल नेपाल प्रगतिशील लेखक सङ्घ (अन्पा) अत्यन्त दुखित भएको छ । शोकको यस घडीमा हाम्रो सङ्गठन प्रा. सुवेदीप्रति भावपूर्ण श्रद्धाञ्जली तथा सन्तप्त परिवार जनप्रति समवेदना प्रकट गर्दछौँ ।
आजै भारतका प्रसिद्ध वामपन्थी इतिहासकार लालबहादुर वर्माको निधनप्रति पनि हाम्रो सङ्गठन दुःख प्रकट गर्दछ । वर्माले इतिहास लेखनको क्षेत्रबाट भारत र विश्वभरिका मानव समुदायप्रति महत्त्वपूर्ण योगदान दिनुभएको थियो । हामी वर्माप्रति भावपूर्ण श्रद्धाञ्जली तथा शोकसन्तप्त परिवार जनप्रति समवेदना प्रकट गर्दछौँ ।”
