धनगढी । कैलालीको बर्दगोरीयामा बसको ठक्करबाट २ बालकको मृत्यु भएपछि स्थानीयले राजमार्गमा चक्काजाम गरेका छन् । सडक अवरुद्ध भएपछि दर्जनौ सवारीसाधन र सयौं यात्रुहरु राजमार्गमा नै अलपत्र परेका छन् ।

महेन्द्रनगरबाट काठमाडौं जाँदै गरेको महाकाली यातायातको ना ७ ख ६०४६ नम्बरको बसले बिहीबार साँझ ५ बजे दुई बालक सवार साइकललाई ठक्कर दिएको थियो । बसको ठक्करबाट बर्दगोरीया गाउँपालिका १ साझा चौकका ८ वर्षीय अंशु चौधरी र घोडाघोडी नगरपालिका ८ का १२ वर्षीय लक्ष्मण चौधरीको मृत्यु भएको हो ।

बसको ठक्करबाट गम्भीर घाइते भएका अंशुको भारतको लखनउ र लक्ष्मणको नेपालगंजमा उपचारको क्रममा मृत्यु भएको प्रहरीले जनाएको छ । बस र बस चालकलाई इलाका प्रहरी कार्यालय लम्कीले नियन्त्रणमा लिएको छ ।