नवीन केसी, प्यूठान ।
झिमरुक गाउँपालिकामा चित्रकला प्रदर्शन गरिएको छ । वैशाख ८ गते गाउँपालिकाको हलमा प्रदर्शन गरिएको हो । काठमाडौंबाट प्यूठानको झिमरुक र गौमुखी पुगेका कलाकारहरूले स्थानीय भूगोल, जनजीवन, धार्मिक र पर्यटकीय क्षेत्रका चित्रहरू बनाएर प्रदर्शन गरेका हुन् ।
यही वैशाख ४ गतेदेखि ८ गतेसम्म ढुंगे बगैंचा, ओखरकोट, बाँदीकोट, चौके, मच्छी र गौमुखीको प्रत्यक्ष चित्रहरू बनाइएको थियो । इख्नाथान, दियाल्ना, बालुवाको बराहथानलगायतका क्षेत्रको चित्र बनाउन बाँकी रहेको जानकारी दिइएको थियो । करिब तीस दर्जन चित्रहरू प्रदर्शन गरिएको थियो ।
‘चित्रहरू पूरा गर्न बाँकी छ, अहिले प्रारम्भिक रूपमा देखाइएको मात्रै हो’ चित्रकार रत्नकुमार राइले आफ्नो चित्र प्रदर्शन गर्दै भन्नुभयो ।
चित्रकार रत्नकुमार राई, जीवन राजोपाध्याय, नरेश सैंजु, राजकुमार राना मगर, सुदेशा श्रेष्ठ, सुजिता महर्जन, कुन्तीश्री थापामगर, सारा तुनिच राई र कुकेश श्रेष्ठले बनाएका चित्रहरू प्रदर्शन गरिएको थियो । सुदर्शन कार्कीले स्थानीय जनजीवन, चराचुरुङ्गी, भूगोलका फोटो र भिडियो बनाउनुभएको छ ।
प्रदर्शनी अवलोकन गर्दै नेकपा मसालका महामन्त्री मोहनविक्रम सिंहले चित्रकलाले सयौं वर्ष पछिसम्म महत्त्व राख्ने बताउनुभयो । सबै कलाकारहरूले आफ्नो धारणा राखेका थिए ।
प्रदर्शनपछि कलाकारहरूलाई एक कार्यक्रमका बीच विदाइ गरिएको थियो । झिमरुक गाउँपालिकाका प्रमुख तिलक जीसी, उपाध्यक्ष पवित्रा जीसी, प्रमुख प्रशासकीय अधिकृत कमलप्रसाद भुसालले विदाइ गरेका थिए ।
विदाइ कार्यक्रममा अखिल (छैठौं) का केन्द्रीय अध्यक्ष विमल पोखरेल, सुमन श्रेष्ठ, कमलप्रसाद भुसाल, वडा नम्बर २ का वडाअध्यक्ष बलदेव एमसीले शुभकामना दिएका थिए ।
