बासुदेव गिरी, झिमरुक, प्यूठान । झिमरुक गाउँपालिकाका किसानलाई लाखौँको प्रविधि हस्तान्तरण गरिएको छ । गाउँपालिकाको कृषि इकाई शाखाले ५० प्रतिशत अनुदानमा धान, गहुँ, चुटेर भुस र फल अलग्याउने एक थान मल्टी थ्रेसर मेशिन प्रदान गरेको हो । गाउँपालिकाको वडा नम्वर ५ मा रहेको नव निर्मित कृषि समूहलाइ प्रविधि हस्तान्तरण गरियो ।
मल्टी थ्रेसर मेशिन खरिदमा समूहको एक लाख ६० हजार र गाउँपालिकाको एक लाख ६० हजार गरी कुल तीन लाख २० हजार लगानी भएको छ । चालु आर्थिक वर्षमा स्वीकृत कार्यक्रम अन्तरगत व्यवसायिक किसानलाई हौसला प्रदान गर्नका लागि मेशिन वितरण गरिएको कृषि इकाई शाखा प्रमुख टेक बहादुर विकले बताए । गाउँपालिकाभित्र गठन भएका कृषक समूह मध्येबाट आवश्यक प्रक्रिया पुगेका समूहलाई छनोट गरी उक्त थ्रेसर मेशिन वितरण गरिएको बिकले जानकारी गराए ।
कृषिमा आधुनिकीकरण ल्याउन यसले मद्दत पुग्ने उनको विश्वास छ । गाउँघरमा मजदुरको अभाव बढ्दै गएकाले किसानलाइ सहजताका लागि प्रबिधियूक्त मल्टी थ्रेसर मेशिन बितरणलाइ प्राथमिकतामा राखिएको गाउँपालिका सूचना अधिकारी निम प्रसाद भण्डारीले जानकारी गराए । स्थानीय किसानहरुलाइ प्रबिधिमैत्री बनाइ कृषिमा आकर्षण र आत्मनिर्भर बनाउन यस्ता कार्यक्रमले सघाउ पु¥याउने उनको विश्वास छ । मेशिन पाएपछि समूहमा आवद्ध किसानहरु हौसिएका छन् ।
