काठमाडौं । वुमन्स च्याम्पियन्स लिग क्रिकेटको उपाधि चितवन राईनोजले हात पारेको छ । काठमाडौंको कीर्तिपुर खेल मैदानमा बिहीबार भएको फाईनल खेलमा क्याट क्वीन्स काठमाडौंलाई पराजित गर्दै चितवन राईनोजले सो उपाधि हात पार्न सफल भएको हो ।
४५ रनको जित निकालेको चितवनले उपाधिसँगै ७ लाख पुरस्कार प्राप्त गरेको छ । उपविजेता काठमाडौंले ३ लाखमा खुम्चियो । चितवनले दिएको १ सय १३ रनको सामान्य लक्ष्य पछ्याएको काठमाडौं २० ओभरमा सबै विकेट गुमाएर मात्र ६७ रन बनाउन सक्यो ।
काठमाडौंका लागि अप्सरी बेगमले सर्वाधिक १५ रन जोड्दा ममता थापा र ईश्वरी बिष्टले समान १३/१३ रन जोड्नु बाहेक अन्य ब्याट्सवुमनले सम्झन लायक प्रदर्शन गर्न सकेनन् । यस अघि सम्पन्न सबै खेलमा उत्कृष्ट इनिङ्स खेलेकी ओपनर रुबिनाले २ रन जोड्दै पवेलियनको बाटो फर्किदा अर्की ओपनर सोभा आले ६ रनमा सुमन खतिवडाको बलमा बोल्ड भएकी थिइन् ।
काठमाडौंको इनिङ्सलाई सस्तैमा समेट्न सुमन खतिवडा र ऋतु कनोजियाले समान ३/३ विकेट हात पार्दा रेखा रावलको नाममा २ विकेट रह्यो । यसअघि टस हारेर पहिले ब्याटिङ गरेको चितवनले पुरै २० ओभरमा ४ विकेट गुमाएर १ सय १२ रन सामान्य स्कोर जोड्न सफल भएको थियो ।
चितवनका लागि सुमन खतिवडाले सर्वाधिक २९ रन जोड्दा कप्तान इन्दु बर्मा २२ रनमा नटआउट रहिन । यस्तै काजल श्रेष्ठले २१ तथा कन्चन श्रेष्ठले १९ रन जोड्दै पवेलियन फर्किइन् ।
बलिङ तर्फ काठमाडौंकी संगीता राई, लक्ष्मी साउद र सरस्वती कुमारीले समान १/१ विकेट लिए । क्विन्स इभेन्ट्स म्यानेजमेन्टको आयोजनामा सञ्चालन भएको प्रतियोगितामा विभिन्न पाँच शहरका पाँच टोली सहभागी भएको थिए ।
