काठमाडौं । संसद सचिवालयकी कर्मचारीलाई बलात्कार प्रयास गरेको आरोपमा प्रहरी हिरासतमा रहेका निवर्तमान सभामुख कृष्णबहादुर महराको तिहार पनि हिरासतमै बित्ने भएको छ ।

दशैँ अघि असोज १९ गते पक्राउ परेका महरालाई थप ७ दिन हिरातमा राखेर अनुसन्धान गर्न अदालतले अनुमति दिएको छ । बिहीबार काठमाडौं जिल्ला अदालतमा उपस्थित गराइएका महरालाई ७ दिन थुनामा राखेर थप अनुसन्धान गर्न अदालतले म्याद दिएको हो।

संसद सचिवालयमा कार्यरत रोशनी शाहीले गत असोज १२ गते महराले आफूमाथि जवर्जस्त करणी गरेको आरोप लगाएकी थिइन् ।

१५ असोजमा सभामुख पदबाट राजीनामा दिएका उनी सभामुखको सरकारी निवासबाटै पक्राउ परेका थिए। प्रहरी हिरासतमा पुगेपछि उनकाे सांसद पद पनि निलम्बनमा परेकाे छ ।