काठमाडौं । कांग्रेस सांसद एवं पूर्वमन्त्री मोहम्मद अफताव आलमको अर्को अपराधको घटना पनि सार्वजनिक भएको छ । १२ वर्षअघि बम विस्फोटका घाइतेहरूलाई जीउँदै इँटाभट्टामा जलाएर मारेको आरोपमा पक्राउ परेका आलमले त्यस अघि पनि तत्कालिन जिविस सदस्यलाई अपहरण गरी हत्या गर्ने प्रयास गरेको सार्वजनिक भएको हो ।

वन तथा भू संरक्षण राज्यमन्त्री भएका बेलामा ०५६ चैत २७ गते रौतहट जिविस सदस्य जयप्रकाश कौसललाई अपहरण र हत्याको प्रयास गरेको पुष्टि भएपछि उनी पदबाट बरखास्त भएका थिए ।

जिविस सदस्य कौसलका अनुसार आलमले गरेका विभिन्न अनियमितता र भ्रष्टाचारबारे जिविसले बनाएको छानविन समितिका उनी संयोजक थिए । सो समितिले आलमकै संलग्नतामा ब्यापक भ्रष्टाचार भएको ठहर गरी जिविसबाट निकासा हुने रकम रोक्न सिफारिस गरेको थियो । त्यसबाट क्रुद्ध भएको आलम समूहले उनलाई विजिसबाटै अपहरण गरी बाँधेर निर्घात कुटपिट गरी हत्या प्रयास गरेको थियो ।
पछि राति नै प्रहरीले गाउँ घेरा हालि उनलाई अपहरणमुक्त पारेर ज्यान जोगाएको थियो ।

त्यस घटनाबारे संसदमा तत्कालिन एमालले हंगामा मच्चाएपछि घटनाको छानविन गर्न एक समिति पनि बन्यो । समितिले आलमकै संलग्नतामा कौशलको अपहरण र हत्या प्रयास भएको प्रतिवेदन दिएको थियो । सोही कारणले पदमुक्त भएपनि आलमविरुद्ध कुनै कानुनी कारबाही भने भएन ।

आलम त्यतिबेला गिरिजाप्रसाद कोइराला नेतृत्वको सरकारमा वन तथा भूरसंरक्षण राज्यमन्त्री थिए । गम्भीर अपराध गरे पनि कुनै कारबाही नभएपछि आलम थप हौसिएर २०६४ को बमकाण्ड गर्न पुगेका थिए । जहाँ चुनावमा बुथ कब्जा गर्न र आतंक फैलाउन बनाउँदै गरेका बम विस्फोट हुँदा थुप्रै घाइते भएका थिए । घाइतेहरुलाई उपचार गर्नको सट्टा आलमले प्रमाण नष्ट गर्न इँट्टा भट्टाको आगोमा हालेर हात्या गरेका थिए ।