काठमाडौं । वैज्ञानिक तथा सामाजिक अभियन्ता महावीर पुनको नेतृत्वमा काठमाडौंमा ‘राष्ट्रिय आविष्कार केन्द्र’ स्थापना गरिएको छ । शुक्रबार काठमाडौंको कीर्तिपुरस्थित त्रिभुवन विश्वविद्यालय परिसरमा राष्ट्रिय आविष्कार केन्द्रको स्थापना गरिएको हो । देश विदेशमा रहेका दाताहरुको सहयोगमा करिब ८ करोड लगानीका सो केन्द्र स्थापना गरिएको केन्द्रका अध्यक्ष पुनले बताए ।
अभियन्ता पुनका अनुसार आविष्कार केन्द्र भनेको प्रतिभा भएका मानिसलाई पालनपोषण गर्ने ठाउँ हो, जहाँ रहेर उनीहरुले आफ्नो रुचि, ज्ञान र दख्खल भएको विषयमा खोज अनुसन्धान गर्छन् । देशको आर्थिक विकास गर्न देशका प्रतिभाशाली सन्ततिलाई देशभित्रै बसेर काम गर्ने वातावरण मिलाइदिने एउटा अभियान नै आविष्कार केन्द्र हो ।
केन्द्रमा हाल २० वटा प्रोजेक्ट सञ्चालनमा आएका छन्। ड्रोन, बायोमेडिकल, कृषि, शिक्षा, स्वास्थ्य लगायतका क्षेत्रमा नयाँ–नयाँ अनुसन्धानको काम सुरु गरिएको पनि केन्द्रले जनाएको छ । केन्द्रले हाल चितवनमा कुखुराको दाना र माछा पालनका लागि काम गरिरहेको छ ।
त्यसैगरी पर्यटन, कृषिका क्षेत्रमा पनि पोखरा, विराटनगरलगायतका सहरमा काम सुरु गरिएको छ । केन्द्रका अध्यक्ष पुनले नयाँ आविष्कारको क्षेत्रमा काम गर्न केन्द्रले शैक्षिक योग्यताको माग नगर्ने पनि स्पष्ट पारे । उनले नयाँ काम गरेर उद्यमी बन्न र रोजगारीको अवसर सृजना गर्ने कामका लागि आवश्यक बजेट र सामग्रीहरुको पनि सहायता गर्ने पनि बताए। नेपालको ग्रामिण क्षेत्रमा पहिलो पटक इन्टरनेट सेवा सञ्चालनमा ल्याएका युवा वैज्ञानिक पुनले सो राष्ट्रिय आविष्कार केन्द्र स्थापनाको पनि नेतृत्वको गरेका हुन् ।
