काठमाडौं । अखिल (छैठौं) ले बैतडीकी किशोरी भागरथी भट्टको बलात्कारपछि हत्या गरिएको भन्दै दोषीलाई कडा कारबाही गर्न माग गरेको छ । अध्यक्ष विमल पोखरेलले शुक्रबार विज्ञप्ति प्रकाशित गरी बलात्कारी, हत्यारालाई कारबाही गर्न माग गर्नुभएको हो ।
घरबाट विद्यालय जान हिँडेकी बैतडीको दोगडाकेदार गाउँपालिका वडा नम्बर ७ की १७ वर्षीया भागरथी भट्टको घर नजिकै जंगलमा शंकास्पद अवस्थामा शव भेटिएको थियो । उनको बलात्कारपछि हत्या भएको आशंका गरिएको छ ।
यस्तो छ, विज्ञप्ति
बैतडीको दोगडाकेदार गाउँपालिका वडा नम्बर ७ की १७ वर्षीया विद्यार्थी भागरथी भट्टको बलात्कारपछि हत्या गरिएको छ । सनातन धर्म माध्यमिक विद्यालयको कक्षा १२ मा अध्ययनरत भट्टको शव माघ २२ गते शरीरभरी निलडाम र लगाएका कपडा च्यातिएको अवस्थामा जंगलमा भेटिएको थियो । विद्यालयबाट घर नफर्केपछि भागरथीको खोजी गरिएको थियो । हामी भागरथी हत्याकाण्डको निन्दा एवं भत्र्सना गर्दछौं ।
देशमा बारम्बार बालिकाहरुको बलात्कार र हत्याका घटना भइरहनु निकै गम्भीर विषय हो । बलात्कार र हत्याका घटना रोक्ने कार्यमा सरकार असफल भएको छ । कैयौं बलात्कार र हत्यामा संलग्न व्यक्तिहरुमाथि कारवाही गर्ने काममा पनि सरकार असफल भएको छ । निर्मला पन्तको बलात्कार र हत्याका अपराधीहरुलाई २ वर्षसम्म कारवाही गर्न नसक्नु त्यसको ज्वलन्त उदाहरण हो ।
भागरथी भट्टको बलात्कारी र हत्याराको तत्काल खोजी गरी कडा कारवाही गर्न माग गर्दछौं । हत्यारालाई कारवाही गर्न आवाज उठाउन सम्पूर्ण विद्यार्थी तथा न्यायप्रेमी जनसमुदायमा हार्दिक अनुरोध गर्दछौं । भागरथीको हत्यारालाई कारवाही गर्नको लागि सञ्चालन हुने आन्दोलनहरुमा अखिल (छैठौं)को ऐक्यबद्धता रहने जानकारी गराउँछौं ।
