नेपालगन्ज । प्रहरीमा भर्ना हुन तालिम लिँदै गरेकी एक युवती प्रहरीबाटै बलात्कारको शिकार भएकी छन् ।कर्णाली प्रदेश प्रहरी तालिम केन्द्र नेपालगन्जमा प्रहरी जवान पदको तालिम लिईरहेकी महिला प्रशिक्षार्थी बलात्कृत भएकी हुन्।
विगत ३ महिनादेखि जवान पदको तालिम लिँदै आएकी प्रशिक्षार्थी महिला सोही तालिम केन्द्रमा कार्यरत प्रहरी नायव निरीक्षक (सई) बमबहादुर रानाबाट बलात्कृत भएकी आफन्तको आरोप छ। सई रानाले आफुलाई विभिन्न दबाव दिएर जबरजस्ती बलात्कार गरेको पीडितको भनाई छ।
पीडितको जाहेरीका आधारमा रानालाई पक्राउ गरी अनुसन्धानका लागि बाँके जिल्ला अदालतबाट म्याद थप गरिएको जिल्ला प्रहरी कार्यालय बाँकेले जनाएको छ । घटनाबारे अनुसन्धान भइरहेको प्रहरीको भनाई छ ।
पीडितका आफन्त भने जनतालाई शान्ति सुरक्षा दिने प्रहरी बन्न आएकी चेली प्रहरीबाटै बलात्कृत भएको भन्दै आक्रोसित भएका छन् ।
