प्रकाश थापामगर/गोविन्दकुमार शर्मा, काठमाडौँ ।।
राष्ट्रिय जनमोर्चाका महासचिव जनकराज शर्माले केपी शर्मा ओली निरङ्कुशताउन्मुख दिशामा अघि बढेको आशङ्का व्यक्त गर्नुभएको छ ।
राजमो काठमाडौँको आयोजनामा २०७७ माघ १७ गते कलङ्कीमा आयोजित विरोधसभामा प्रमुख अतिथिको आसनबाट मन्तव्य राख्दै उहाँले यस्तो आशङ्का व्यक्त गर्नुभएको हो ।
जननिर्वाचित प्रतिनिधि सभा विघटन गरेको सन्दर्भलाई जोड्दै उहाँले भन्नुभयो– ‘केपी ओलीको अधिनायकवादी कार्यशैलीको आधारमा विचार गर्दा उनी निरङ्कुशतातर्फ उन्मुख भएको आशङ्का बढेको छ ।’
महासचिव शर्माले २०७२ सालको नाकाबन्दीताका केपी ओलीले त्यसका विरुद्ध लिएको अडान र चीनसित गरिएको पारवहन सम्झौताले गर्दा नेपाली जनताले उनको नेतृत्वको सरकारलाई बहुमत दिएको दावी गर्नुभयो ।
‘तर ओली सरकारको करिब तीन वर्षको शासनकालले उनको नाकाबन्दीताकाको त्यो अडानलाई निरन्तरता दिँदैन’ उहाँले भन्नुभयो– ‘करिब दुईतिहाइ बहुमतसहितको नेतृत्वको आधारमा ओली सरकारले केही प्रगतिशील काम गर्ला भन्ने आसा थियो, तर जनताको त्यो आसा निरासामा बदलिएको छ ।’
उहाँले अहिलेको गणतन्त्र २०६२–६३ को जनआन्दोलनको महान् उपलब्धि भएको बताउनुभयो ।
‘हामी यस मामिलामा प्रष्ट छौँ, यो व्यवस्थाबाट जनताका आधारभूत समस्या समाधान हुने छैन’ उहाँले भन्नुभयो– ‘फेरि पनि यो व्यवस्था गतकालको निरङ्कुश राजतन्त्रको तुलनामा प्रगतिशील व्यवस्था हो; त्यसकारण यो उपलब्धिको रक्षा गर्नुपर्नेमा हामी दृढ छौँ ।’
उहाँले पटक–पटक आन्दोलनमा जानुपरेकोमा नेपाली जनता वाक्कदिक्क भइसकेको पनि बताउनुभयो ।
‘तर के गर्नुहुन्छ ?’ जनभावनाको लेखाजोखा गर्दै शर्माले अगाडि भन्नुभयो– “जनान्दोलनबाट प्राप्त उपलब्धि त्यसपछिका सत्तासिन दलहरूले संस्थागत गर्न नसकेकै कारण फेरि पनि अहिले आन्दोलनमा जानुपर्ने आवश्यकता भएको छ ।’
उहाँले फेरि एक पटक पछिल्लो जनान्दोलनको उपलब्धि गुम्न थालेकाले प्रतिनिधि सभा पुनःस्थापनाका लागि आन्दोलनमा जुट्न जनतासित आग्रह गर्नुभयो ।
सम्बोधनको क्रममा उहाँले नेपालमा सङ्घीय व्यवस्थाअन्तर्गत भौतिक विकास निर्माणको काम सम्भव हुन नसक्ने दावी गर्नुभयो ।
‘सात वटा प्रदेशका र एउटा केन्द्रका गरी आठ वटा सरकारलाई कसरी पाल्ने ?’ उहाँले प्रतिप्रश्न गर्नुभयो– ‘करवृद्धि गरेर भए पनि उठाएको भएभरको राष्ट्रिय आय प्रशासनिक खर्चमै सिद्धिएपछि भौतिक विकास निर्माणका लागि बजेट बच्दै बच्दैन; अनि, कसरी भौतिक विकास निर्माण गर्ने ?’
‘त्यसमाथि सङ्घीयताले जातीय, क्षेत्रीय र धार्मिक विग्रह ल्याउन थालेको छ । त्यसैले सङ्घीयतालाई तत्कालै खारेज गरिनुपर्दछ’ उहाँले भन्नुभयो ।
कार्यक्रममा सम्बोधन गर्दै अखिल नेपाल महिला सङ्घकी अध्यक्ष मीना पुनले दुईतिहाइ बहुमतप्राप्त सत्तारूढ दल नेकपाभित्रै सत्तापक्ष र प्रतिपक्ष देखिएकाले अहिलेको राजनीतिक सङ्कट आइपरेको बताउनुभयो ।
‘देश र जनताको समस्या कसरी समाधान गर्ने भनेर होइन, आन्तरिक खिचलोकै कारण देखाएर जननिर्वाचित प्रतिनिधि सभा विघटन गरियो’ पुनले भन्नुभयो ।
नेकपा (मसाल) बागमती प्रदेशका प्रवक्ता समीर सिंहले गणतन्त्र र धर्म निरपेक्षता नेपाली जनताको जनादेश भएकाले त्यसको रक्षा गरिनुपर्ने आवश्यकतामा जोड दिनुभयो ।
२०६२–६३ सालको आन्दोलन र गत २०७४ सालको निर्वाचनको जनादेशले गणतन्त्र र धर्म निरपेक्षतालाई अनुमोदनसमेत गरेको बताउँदै उहाँले भन्नुभयो– ‘केपी ओली सरकारले जननिर्वाचित प्रतिनिधि सभा विघटन गरेर जनमतमाथि कुठाराघात गरेको छ ।’
उहाँले पनि तत्कालै प्रतिनिधि सभा पुनःस्थापना गर्नुपर्ने आवश्यकतामा जोड दिनुभयो ।
राजमो काठमाडौँका सल्लाहकार लक्ष्मणदेव पाण्डेको सञ्चालन तथा राजमो चन्द्रागिरी नगरपालिका समितिका अध्यक्ष मोहन जिसीको अध्यक्षतामा अघि बढेको उक्त कार्यक्रममा राजमो चन्द्रागिरीका रोसन दानीले स्वागत मन्तव्य राख्नुभएको थियो ।
कार्यक्रममा रक्तिम सांस्कृतिक अभियानका कलाकारहरूले “मधेसी–पहाडी” र “तलमा पर्यो” शीर्षकको गीतमा नृत्य प्रस्तुत गर्नुभएको थियो ।
