काठमाडौँ । तोडफोड आरोपी सांसद प्रमोदकमार साहलाई अदालतले चार दिन हिरासतमा राखेर अनुसन्धान गर्न आदेश दिएको छ । जिल्ला अदालत धनुषाले प्रतिनिधिसभा सदस्य साहलाई ४ दिन हिरासतमा राखेर अनुसन्धान गर्ने अनुमति दिएको हो ।
बुधबार जिल्ला अदालतमा पेस गरिएका साहलाई थप अनुसन्धानका लागि प्रहरीले १० दिनको समय माग गरेपनि अदालतले भने ४ दिनको मात्र म्याद थप गरेर अनुसन्धान गर्नका लागि आदेश दिएको हो ।
सर्लाही निर्वाचन क्षेत्र १ बाट निर्वाचित प्रतिनिधिसभा सदस्य प्रमोदकुमार साहलाई जनकपुर बिमानस्थलमा रहेको बुद्ध एयरको काउन्टरमा तोडफोड गरेपछि प्रहरीले मंगलबार पक्राउ गरेको थियो ।
यता, सांसद साहको mरिहाईको माग गर्दै राजपा नेपालले जनकपुर र वीरगञ्जमा प्रदर्शन गरेको छ । जनकपुरमा चक्काजाम गरिएको छ भने बुद्ध एयरको टिकट बिक्री कक्षको मूल गेटमा राजपाले धर्ना दिएको छ ।
धर्नामा राजपा प्रदेश नम्बर–२ का संसदीय दलका प्रमुख सचेतक परमेश्वर साह, जनकपुरधाम उपमहानगर पालिकाका उपमेयर रिता झा, पूर्व सांसद दिनेश साह लगायत सहभागी छन् ।
