काठमाडौं । फिफा विश्वकप छनोटको दोस्रो चरणमा नेपाल जार्डनसँग ३–० ले पराजित भएको छ । बुधबार जोर्डनको अम्मान रंगशालामा भएको खेलमा नेपालले कुनै गोल गर्न सकेन ।

पहिलो हाफ गोलरहित बराबरी भएको खेलको दोस्रो हाफको जोर्डन सबै गोल गरेको हो । ५५औं मिनेटमा नेपालका दिनेश राजवंशीले फल गरेपनि जोर्डनले पेनाल्टी पायो । जसलाई फेरहास जायदले गोल गर्दै घरेलु टिमलाई अग्रता दिलाए ।

७८औं मिनेटमा अहमेद अल इर्सानले गोल गर्न सफल भए । उनले लेफ्ट साइडबाट गरेको प्रहारलाई किरण चेम्जोङले बचाउन सकेनन् । ८७औं मिनेटमा नेपालले तेस्रो गोल खायो ।

नेपालको कमजोर डिफेन्सको फाइदा उठाउँदै फैसलले हेड मार्फत गोल गरे । जितसँगै जोर्डनले ३ खेलमा ७ अंक बनाएको छ।

उसले ३ मा २ जित र एक बराबरी खेलेको छ । नेपालको ४ खेलमा ३ अंक छ। नेपालले ४ खेलमा ३ हार र १ जित निकालेको छ ।