काठमाडौं । राष्ट्रिय जनमोर्चा, काठमाडौंले माघ महिनाभरिका लागि संघर्षका कार्यक्रम तय गरेको छ । शनिबार कपनस्थित केन्द्रीय कार्यालयमा भएको भेलाले प्रतिनिधिसभा पुनर्स्थापना, संघीयताको खारेजी, भ्रष्टाचार नियन्त्रण, राष्ट्रियता, गणतन्त्र र धर्म निरपेक्षता रक्षाको मागसहित संघर्षका कार्यक्रम तय गरेको हो ।

घोषित कार्यक्रम अनुसार माघ ३ गतेदेखि मसान्तसम्म राजधानीका मुख्य आठवटा स्थानमा जनसभा गरिनेछ भने नगर र वडास्तरमा कोणसभा, पर्चा वितरण, जनभेटघाट लगायतका कार्यक्रम गरिनेछ ।

माघ ३ गते गोंगबुस्थित बिजीमलबाट कार्यक्रमको उद्घाटन गरिनेछ । यस्तै, ६ गते सामाखुशी, १० गते बसुन्धरा, १६ गते नयाँ बसपार्क, १७ गते कलंकी, २४ गते चाबहिल, २७ गते कोटेश्वर र ३० गते जुलुशसहित रत्नपार्कस्थित शान्तिवाटिकामा जनसभा गरी माघ महिनाको संघर्षका कार्यक्रम समापन गरिनेछ । ती सबै कार्यक्रममा रक्तिम सांस्कृतिक अभियानका कलाकारहरुले विभिन्न सांस्कृतिक कार्यक्रमसमेत प्रस्तुत गर्नेछन् ।

यसबाहेक विभिन्न नगर र वडास्तरमा कार्यक्रम गरिने तथा विभिन्न जनवर्गीय संगठनहरुको आयोजनामा पनि बेग्लाबेग्लै कार्यक्रम हुने राजमो काठमाडौंले जनाएको छ ।

यो पनिः  प्रतिक्रियावादी र उग्रवामपन्थीहरु अन्ततः एकै ठाउँमा मिल्न जान्छन् : सिंह

राजमोले प्रतिनिधि सभा विघटनविरुद्ध संघर्ष गर्ने अन्य राजनीतिक शक्तिहरुसँग पनि संयुक्त आन्दोलनको पहल गर्ने एवम् अन्य दल तथा संघ संस्थाले आयोजना गरेका कार्यक्रमप्रति ऐक्यवद्धता जनाउने नेता आनन्द शर्माले बताउनुभयो ।

कार्यक्रमलाई सम्बोधन गर्ने क्रममा नेता शर्माले भन्नुभयो, ‘हाम्रो पार्टीले अन्य राजनीतिक शक्तिहरुसँग मिलेर पनि संयुक्त कार्यक्रम बनाउने पहल गरिरहेको छ । त्यसो हुन नसकेपनि हामीले एकल कार्यक्रम गर्दै अरु संगठनका कार्यक्रमप्रति समर्थन गर्नेछौं ।’
उहाँले प्रतिनिधिसभा विघटन विरुद्ध संघर्षमा जोड दिँदै यसअघि तय भएका संघीयताको खारेजी, गणतन्त्र र धर्मनिरपेक्षताको रक्षा तथा भ्रष्टाचारविरुद्धको संघर्षका कार्यक्रमलाई पनि निरन्तरता दिइने बताउनुभयो ।

राजमो काठमाडौंका अध्यक्ष झविन्द्र बेलबासेको अध्यक्षतामा भएको कार्यक्रममा उपाध्यक्ष राजेन्द्र पुडासैनीले स्वागत गर्नुभएको थियो भने सञ्चालन अभिवक्ता लक्ष्मणदेव पाण्डेले गर्नुभएको थियो । कार्यक्रममा नेकपा (मसाल) का महामन्त्री मोहनविक्रम सिंहले प्रशिक्षण दिनुभएको थियो ।

भेलामा राष्ट्रिय जनमोर्चाका केन्द्रीय सदस्यद्वय लालबहादुर थापा र घनश्याम न्यौपाने, अखिल नेपाल युवक संघका अध्यक्ष अनिलकिशोर घिमिरे, अखिल नेपाल कानुन व्यवसायी संघका अध्यक्ष पदम रोका, अखिल नेपाल महिला संघका कोषाध्यक्ष रितु केसी, अखिल नेपाल बुद्धिजीवी संघका महासचिव भरतमणी भण्डारी, रक्तिम सांस्कृतिक अभियानका केन्द्रीय कोषाध्यक्ष विष्णु शर्मा, प्रगतिशील लेखक संघका महासचिव एवम् नेकपा (मसाल) वागमती प्रदेश प्रवक्ता समीर सिंह, काठमाडौं जिल्ला प्रवक्ता जगत रेग्मी, प्रगतिशील पत्रकार संघका केन्द्रीय सदस्य एवम् युगदर्शनका सम्पादक विद्यानाथ अधिकारी लगायत नेताहरुको आतिथ्यता रहेको थियो ।