काठमाडौं । चिनियाँ राष्ट्रपति सी चिनफिङसँग सत्तारुढ नेपाल कम्युनिस्ट पार्टी (नेकपा) का नेताहरुले सामूहिक भेटवार्ता गरेका छन् । आइतबार बिहान होटल सोल्टीमा राष्ट्रपति सी र नेकपाका शीर्ष नेताहरुबीच सामूहिक भेटवार्ता भएको हो ।भेटवार्तामा अध्यक्ष प्रचण्ड, वरिष्ठ नेता झलनाथ खनाल, माधव कुमार नेपाल, सचिवालय सदस्यहरुः बामदेव गौतम, विष्णु पौडेल, ईश्वर पोखरेल, नारायणकाजी श्रेष्ठ, रामबहादुर थापा सहभागी थिए । परराष्ट्रमन्त्री प्रदीप ज्ञवाली पनि भेटवार्तामा सहभागी थिए ।

यस्तै, कांग्रेस सभापति शेरबहादुर देउवालाई राष्ट्रपति सीले एकल भेट दिएका छन् । भेटवार्ताका क्रममा देउवालाई राष्ट्रपति सीले चीन भ्रमणको निम्तो दिएका छन् । राष्ट्रपति सीको निम्तो पाएका देउवा चीन जाने भएका कांग्रेसका एक नेताले जनाएका छन् ।
राष्ट्रपति सीसँग सत्तारुढ नेकपाका अध्यक्ष तथा पूर्व प्रधानमन्त्री पुष्पकमल दाहालबीच पनि भेटवार्ता भएको छ।

सत्तारुढ नेकपाको सचिवालय सदस्यसँगको सामूहिक भेटपछि प्रचण्डले राष्ट्रपति सीसँग एक्लै भेट गरेका हुन । सीलाई प्रचण्डले एक्लै भेट गरेको नेकपाका एक नेताले बताए । सीसँग प्रचण्डको यो चौथो भेट हो ।

सन् २०१३ मा राष्ट्रपति भएलगत्तै सीले तत्कालीन एकीकृत माओवादीका अध्यक्ष रहेका प्रचण्डलाई एक्लै बेइजिङ निम्त्याएर भेटवार्ता गरेका थिए । त्यसपछि सीसँग प्रचण्डको भेट दोस्रो पटक प्रधानमन्त्री भएपछि बेइजिङमा र ब्रिक्स–बिमस्टेक आउटरिचमा सहभागी हुने क्रममा भारतको गोवामा भएको थियो ।

एक मिहनाअघि राष्ट्रपति सी भ्रमणको तयारीकै क्रममा नेपाल आएका चीनका विदेशमन्त्री वाङ यीसँग पनि प्रचण्डले एक्लै भेटवार्ता गरेका थिए । यसैबीच चिनियाँ राष्ट्रपति सी र प्रधानमन्त्री केपी शर्मा ओलीबीच १५ मिनेट छुट्टै भेटवार्ता भएको छ । प्रधानमन्त्री ओलीसँग विदाई भेटवार्ता गरेका हुन् ।भेटलगत्तै राष्ट्रपति सी विमानस्थल प्रस्थान गरेका छन् ।