नवलपरासी । राष्ट्रिय जनमोर्चा नवलपरासी (पश्चिम)ले ‘गणतन्त्र, राष्ट्रियता र धर्मनिरपेक्षताको रक्षा गरौँ, संघीयता र भष्टाचारविरुद्ध संघर्ष गरौं’ भन्ने नारासहित जिल्लामा मोटरसाइकल र्यालीको आयोजना गरेको छ ।
शनिबार जिल्लाको सुनवल, परासी, पठखौलि, भटौलिया, जमुनिया, गोपिगञ्ज, बर्दघाट हुँदै भुताहासम्म र्याली सम्पन्न गरेको हो । त्यसक्रममा संघीयताको खारेजी, प्रतिगमनको खतरा, भ्रष्टाचारलगायतका विरुद्ध खबरदारी गर्दै पर्चा वितरण तथा ठाउँठाउँमा कोणसभाको आयोजना गरिएको थियो ।
कार्यक्रममा रक्तिम सांस्कृतिक अभियानका अध्यक्ष रेम राना, राजमो नेताहरु तिलकप्रसाद सुवेदी, उत्तम खरेल, सम्झना सुवेदी लगायतले सम्बोधन गर्नुभएको थियो ।
वक्ताहरूले बर्तमान अवस्थामा नेकपाको सरकार जनताप्रति उत्तरदायी नभएको आरोप लगाउनुभयो । सत्ताधारीहरुको व्यक्तिगत स्वार्थका कारणले प्रतिगमनको खतरा उत्पन्न भएको भन्दै बर्तमान सरकार र सत्ताधारीहरुले भावि पुस्तालाई जवाफ दिनुपर्ने नेताहरुको भनाई थियो ।
