बागलुङ । राष्ट्रिय जनमोर्चा बडिगाड गाउँ समितिको आयोजनामा अगुवा कार्यकर्ता प्रशिक्षण २०७७ पौष ४ गते खारबजारमा सम्पन्न भएको छ ।
कार्यक्रममा राष्ट्रिय जनमोर्चा बागलुङका अध्यक्ष अमर थापाले भ्रष्टाचार, बलात्कारजस्ता विकृति र विसङ्गतिहरू बढिरहेकोमा चिन्ता व्यक्त गर्नुभयो । त्यस्तै सङ्घीयताका कारण जनतालाई करको भारी थपिनुका साथै सामाजिक सद्भावसमेत खल्बलिदा देशको राष्ट्रियता कमजोर बनेको पनि उहाँले दावी गर्नुभयो । देशको यस्तो गम्भीर अवस्थामा झन् सक्रियतापूर्वक लाग्न जिल्लाध्यक्ष थापाले कार्यकर्ताहरूलाई आह्वान गर्नुभयो ।
प्रशिक्षणमा राष्ट्रिय जनमोर्चाका राष्ट्रिय परिषद् सदस्यहरू गौरीश्वर पाण्डे र तिलक थापाले पनि प्रशिक्षण दिनुभएको थियो ।
कार्यक्रममा राष्ट्रिय जनमोर्चा बागलुङका सचिव भिमलाल पोखरेल, जिल्ला सदस्यहरू बोमबहादुर थापा, पदम श्रेष्ठ, कोपिला थापालगायतको आतिथ्यता रहेको थियो ।
कार्यक्रम मेकबहादुर पाइजाको अध्यक्षता, कर्ण सिंजालीको सञ्चालन र भिमसेन वनको स्वागत मन्तव्यका साथ सम्पन्न भएको थियो ।
