वीरेन्द्रनगर । राष्ट्रिय जनमोर्चा सुर्खेतले छिन्छुबजारमा विरोधसभा सम्पन्न गरेको छ । ‘गणतन्त्र, राष्ट्रियता र धर्म निरपेक्षताको रक्षा गरौँ, सङ्घीयता र भ्रष्टाचारको विरोध गरौँ’ मूल नाराका साथ २०७७ पुस ३ गते सो कार्यक्रम सम्पन्न भएको हो ।
कार्यक्रममा प्रमुख वक्ता राष्ट्रिय जनमोर्चाका केन्द्रीय सदस्य रत्नविक्रम प्यासीले गणतन्त्रको रक्षाका लागि अझै पनि सङ्घर्ष गरिरहनुपर्ने पर्ने आवश्यकता औल्याउनुभयो । अहिले प्रतिगामीहरू सल्बलाएको र स्वयम् ओली सरकारको गलत नीतिले उनीहरूलाई मद्दत पुर्याएको बताउँदै उहाँले यस्तो दावी गर्नुभएको हो ।
त्यसैगरी उहाँले राष्ट्रियता र धर्म निरपेक्षताको रक्षाका लागि आवाज उठाइरहनुपर्ने बताउनुभयो । सङ्घीयता र भ्रष्टाचारको विरोध पनि अहिलेको तात्कालिक आवश्यकता रहेको उहाँको भनाइ थियो ।
कार्यक्रममा राजमो कर्णाली प्रदेश समितिका धनप्रसाद देवकोटा, नेकपा (मसाल) सुर्खतका प्रवक्ता मोहन थापा, राजमोका जिल्ला सचिव लालबहादुर नेपाली, अखिल (छैठौं) का केन्द्रीय सदस्य हरि बुढा र अखिल नेपाल अखिल नेपाल युवक सङ्घका केन्द्रीय सदस्य धर्म दानीले सम्बोधन गर्नुभएको थियो ।
कार्यक्रमको सञ्चालन राजमो नेता विष्णुप्रसाद शर्माले गर्नुभएको थियो ।
