माधव खनाल, प्युठान ।
प्युठान जिल्लाको मल्लरानी गाउँपालिका वडा नम्बर ३ धरम्पानीमा रहेको भानुभक्त माध्यमिक विद्यालयले आफ्नो ४६औँ वार्षिक उत्सव तथा १३ औं अभिभावक भेला मनाएको छ । वार्षिक उत्सव तथा अभिभावक भेलाको उद्घाटन गर्दै गाउँपालिका अध्यक्ष अम्मरध्वज रानाले शिक्ष, अभिभावक, विद्यार्थी र शैक्षिक वर्गको आपसी समन्वय भएमा मात्रै शिक्षामा आमूल परिवर्तन हुने कुरामा जोड दिनुभएको थियो ।
यस्तै कार्यक्रमको अवसर पारी विद्यालायमा २०७६को वार्षिक परीक्षामा उत्कृष्ट अङ्क ल्याउने विद्यार्थी र नियमित उपस्थित हुने विद्यार्थीलाई पुरस्कार वितरण समेत गरिएको थियो । कार्यक्रममा विद्यालयका प्रधानाध्यापक चक्रपाणी पौडेलले विद्यालयको प्रगति प्रतिवेदन र सामाजिक परीक्षण समिति सदस्य शिक्षक नोमराज पौडेलले सामाजिक परीक्षण प्रतिवेदन प्रस्तुत गर्नुभएको थियो ।
वार्षिक उत्सव कार्यक्रममा विद्यालयका प्रधानाध्यापक तथा शैक्षिक व्यक्तित्व चक्रपाणी पौडेल र सामाजिक व्यक्तित्व पदमप्रसाद पौडेलद्वारा आफ्ना स्वर्गीय आमाबुबाको सम्झनामा स्थापना गरिएको अक्षय कोषमा थप दस हजार थप गर्नुभएको थियो । यस्तै सोही विद्यालयका पूर्व शिक्षक तथा शैक्षिक व्यक्तित्व डिलाराम पौडेलले आफ्ना स्वर्गीय सुपुत्र कमल पौडेलको सम्झनामा शिक्षक गिरिराज जैसी मार्फत रु ५१ हजार १५१ को अक्षयकोष स्थापनाको रकम हस्तान्तरण गर्नुभएको थियो ।
यसैगरी समाजसेवी राजनैतिक तथा कानुनविद बोदिप्रसाद पोख्रेलले आफ्नी श्रीमती स्वर्गीय कमला पोख्रेल र विद्यालयका पूर्व व्यवस्थापन समितिका अध्यक्ष स्वर्गीय केसरबहादुर अधिकारीको सम्झनामा उहाँकी श्रीमती हिरादेवी अधिकारी तथा देवकला भुसालका छोरी स्वर्गीय पुर्णिमा भुसालको स्मृतिमा शैक्षिक उत्प्रेरणा कोषको समेत स्थापना गरिएको छ ।
कार्यक्रममा मल्लरानी गाउँपालिका शिक्षाप्रमुख बासुदेव पण्डित विद्यालयका सामाजिक परीक्षण समिती सदस्य डिलाराम पौडेल र सम्पूर्ण राजनैतिक दलको तर्फबाट नेकपाका नोमराज पौडेलले मन्तव्य राख्नुभएको थियो ।
वार्षिक उत्सव कार्यक्रम विद्यालयका विद्यालय व्यवस्थापन समितिका जेष्ठ सदस्य गिरिराज पौडेलको अध्यक्षता, व्यवस्थापन समितिकी सदस्य सरिता पोख्रेलको स्वागत र शिक्षक धनबहादुर पुनको सञ्चालनमा सम्पन्न भएको थियो ।
