काठमाडौं । प्रहरी हिरासतमा रहेका सांसद कृष्णबहादुर महराको सांसद पद निलम्बनमा परेको छ । संसद सचिवालयका महासचिव मनोहरप्रसाद भट्टराईले बिहीबार महरा निलम्बनमा परेको सूचना प्रकाशित गरेका हुन् ।
सांसदबाट निलम्बनमा परेसँगै अब उनको सेवासुविधा पनि रोक्का हुनेछ । फौजदारी अभियोग लागेमा सांसदलाई निलम्बनमा पर्ने प्रतिनिधिसभा नियमावलीको व्यवस्था छ ।
निवर्तमान सभामुख महरामाथि संसद सचिवालयकै एक महिला कर्मचारीलाई बलात्कार प्रयास गरेको आरोप लागेको छ । १५ असोजमा सभामुख पदबाट राजीनामा दिएका उनी १८ गते सभामुखको सरकारी निवासबाटै पक्राउ परेका थिए ।
महरालाई उनको पार्टी नेकपाले सभामुख र सांसद पदबाट राजीनामा दिन निर्देशन दिएपनि उनले सभामुख पदबाट मात्रै राजीनामा दिएका थिए ।
प्रहरी हिरासतमा रहेकै अवस्थामा उच्च रक्तचापको समस्या देखिएपछि महरालाई थापाथलीस्थित नर्भिक अस्पताल भर्ना गरिएको छ । महराको स्वास्थ्य परीक्षण भइसकेको छ ।
रिर्पोट आउन बाँकी रहेको अस्पतालले जनाएको छ । दशैँ विदाका कारण महराको वयान अगाडि बढ्न सकेको छैन । दशैँ विदा सकिएपछि सोमबारदेखि उनको बयान सुरु हुने प्रहरीले जनाएको छ ।
