काठमाडौं । चिनियाँ राष्ट्रपति सी जिनपिङ शनिबार नेपाल भ्रमणमा आउँदैछन् । २३ वर्षपछि हुन लागेको चिनियाँ राष्ट्रपतिलाई स्वागत गर्न अत्यन्त महत्वका साथ नेपालले तयारी गरेको छ ।
उनको स्वागतार्थ रातारात काठमाडौंका सडक कालोपत्रे गर्ने, खाल्डाखुल्डी पुर्ने, फूल विरुवा रोप्नेदेखि स्वागत ब्यानर तथा तस्बीरहरु राख्ने काम भइरहेको छ ।
तर, राष्ट्रले उच्च महत्व दिएका विदेशी पाहुनाको स्वागतार्थ राखेको कतिपय ब्यानरहरु च्यातिएका छन् । बिजुली बजार पुल, तिनकुने पुल क्षेत्रमा राखिएको ब्यानर च्यातिएका हुन् ।
राष्ट्रपति सीको स्वागतमा राखिएका ब्यानर च्यातेको आरोपमा प्रहरीले दुई जना पक्राउ परेका छन् । त्यसमा संलग्न रहेको आरोपमा प्रहरीले गोपाल सार्की र राजकुमार ठाकुरलाई पक्राउ गरेको हो । उनीहरु दुबैलाई महानगरीय प्रहरी वृत्त बानेश्वरमा राखिएको छ ।
प्रहरीका अनुसार उनीहरुले ब्यानर च्यात्नुको कारण खुलेको छैन । आरोपीमाथि अनुसन्धान सुरु गरिएको छ ।
