काठमाडौं । अखिल नेपाल राष्ट्रिय स्वतन्त्र विद्यार्थी युनियन (छैठौं) ले शिक्षण संस्थामा आक्रमण गरेर आतंक सिर्जना नगर्न विप्लव समूहलाई चेतावनी दिएको छ ।
मोरङको मिक्लाजुङस्थित सरस्वती आधारभूत माविका प्रधानअध्यापक राजेन्द्रकुमार श्रेष्ठको हत्या गरेर शिक्षक तथा विद्यार्थीमा आतंक सिर्जना गरिएको भन्दै छैठौंले शिक्षण संस्थामाथि आक्रमण बन्द गर्न चेतावनी दिएको हो ।
शिक्षाको ज्योति फैलाउने शिक्षकलाई ‘चम्बलका डाँका र रेड इण्डियन शैलीमा अपहरण गरी आततायी ढंगले हत्या गरिएको’ अखिल (छैठौं) ले आरोप लगाएको छ ।
अध्यक्ष विमल पोखरेलद्वार बिहीबार जारी विज्ञप्तिमा भनिएको छ, ‘नेपाल कम्युनिस्ट पार्टी (विप्लव समूह)ले २०७७ मंसिर २३ गते मोरङको मिक्लाजुङस्थित सरस्वती आधारभूत विद्यालयका प्रधानाध्यापक राजेन्द्रकुमार श्रेष्ठको हत्या गरेको छ । श्रेष्ठले माओवादी समूहलाई १० हजार चन्दा नदिंदा हत्या गरिएको समाचार बाहिरिएको छ । अखिल (छैठौं) उक्त हत्याकाण्डको घोर निन्दा र भर्त्सना गर्दै अपराधीलाई कडा कारवाहीको माग गर्दछ ।
शिक्षाको ज्योति फैलाउने शिक्षकलाई चम्बलका डाँका र रेड इण्डियन शैलीमा अपहरण गरी आततायी ढंगले हत्या गरिएको छ । आततायी हत्याकाण्डले सम्पूर्ण शिक्षक र विद्यार्थीमा आतंक सिर्जना भएको छ । शिक्षण संस्थामा आततायी र बर्बर आक्रमण नगर्न विप्लब समूहलाई कडा चेतावनी दिन चाहन्छौं ।’
