काठमाडौँ । योगी नरहरिनाथका पुस्तक अभिलेखीकरण हुने भएको छ । राष्ट्रिय अभिलेखालयले ती पुस्तक अभिलेखीकरण गर्ने भएको हो ।
योगीले सङ्ग्रह गरेका हस्तलिखित ग्रन्थलगायत दस्तावेज भने संरक्षण गरेर स्क्यानिङसमेत गरिने अभिलेखालयले जनाएको छ ।
पशुपति क्षेत्रस्थित मृगस्थलीको गोरक्षपीठमा रहेको आश्रममा अस्तव्यस्त पुस्तक संरक्षणका लागि अभिलेखीकरण सुरु गरिएको अभिलेखालयका अनुसन्धान अधिकृत मनिता न्यौपानेले जानकारी दिए । यहाँ योगी नरहरिनाथले लेखेका ५७१ वटा पुस्तक छन् । योगीलाई प्राप्त भएका पुस्तकसमेत पुस्तकालयमा राखिएको छ । पुस्तकालय माथिको कोठामा हस्तलिखित ग्रन्थलगायत महत्त्वपूर्ण दस्तावेज रहेको जनाइएको छ ।
योगीको निधनपछि गुठी संस्थानले आश्रममा थुनेर राखेको भवन २०७२ वैशाख १२ गतेको भूकम्पले भत्किएपछि धेरै पुस्तक बिग्रिएका छन् । पुस्तक बिग्रन लागेपछि श्री बृहदाध्यात्मिक परिषद्ले योगी नरहरिनाथ स्मृति पुस्तकालय सङ्ग्रहालय सुरु गरेको थियो । त्यहाँ राखिएका पुस्तकको अभिलेखालयले तीन दिनदेखि अभिलेख राख्न सुरु गरेको हो ।
वर्षौंदेखि थुनिएर राखिएका पुस्तकको धुलो झार्ने, मिलाउने सूचीकरण गर्नेलगायत काममा नेपाली सेनाले समेत सघाइरहेको पुस्तकालयमा स्वयम्सेवीका रूपमा काम गर्दै आएकी दीपा दाहालले बताइन् । पुस्तकालय सुरु गरिए पनि स्रोत र साधनको अभावमा व्यवस्थित हुन सकेको छैन । सेनाले आश्रममा भत्किएका संरचना बनाउनसमेत सहयोग गर्ने जनाइएको छ ।
पुस्तकालयमा योगी नरहरिनाथलाई प्राप्त भएका पुस्तकसमेत गरी छ हजार वटाको सङ्ग्रह गरिएको छ । पुस्तकालयमा सन्धिसङ्ग्रह, हिमवत्खण्डलगायत महत्त्वपूर्ण पुस्तक छन् । नरहरिनाथका केही पुस्तक भने पुनः प्रकाशन भएका छन् ।
सन्धिपत्र सङ्ग्रह, गोरक्ष साम्यवादलगायत योगीका पुस्तक चर्चित छन् ।
