काठमाडौं । चिनियाँ राष्ट्रपति सी चिनफिङ यही शनिबार नेपाल आउँदैछन् । चीनबाट नेपालमा २३ वर्षपछि उच्चस्तरको भ्रमण हुन लागेको हो ।
चीनको परराष्ट्र मन्त्रालयले राष्ट्रपति सी चिनफिङले नेपालको राजकीय भ्रमण गर्ने औपचारिक घोषणा गरेको छ । राष्ट्रपति सी २५ असोजमा नेपाल भ्रमणमा आउने चर्चा भएपनि बेइजिङले बुधबार मात्रै औपचारिक रुपमा मिति घोषणा गरेको हो।
चिनियाँ परराष्ट्रमन्त्रालयकी प्रवक्ता हुवा चुनयीङले राष्ट्रपति सीले ११–१३ अक्टोबरमा नेपाल र भारतको भ्रमण गर्ने घोषणा गरेकी हुन् ।
प्रवक्ता चुनयिङका अनुसार राष्ट्रपति सी भारतको तमिलनाडु राज्यको चेन्नईमा भारतीय प्रधानमन्त्री नरेन्द्र मोदीसँग दोस्रो अनौपचारिक बैठकमा सहभागी हुनेछन् भने त्यसपछि नेपालको राजकीय भ्रमण गर्नेछन् ।
सी शुक्रबार बेइजिङबाट भारतको चेन्नई पुग्ने र त्यो एक रात त्यहाँ बिताएर शनिबार अपरान्ह काठमाडौं आउने गरी तयारी छ । उनी शनिबार काठमाडौंमा बसेर आइतबार बेइजिङ प्रस्थान गर्नेछन्।
