काठमाडौं । निवर्तमान सभामुख कृष्णबहादुर महराविरुद्ध पीडित रोशनी शाहीले प्रहरीमा उजुरी दिएकी छन् । शाहीले महराविरुद्ध नयाँ बोनश्वर प्रहरी वृत्तमा जबर्जस्ती करणी उद्योगअन्तगर्गत किटानी जाहेरी दिएकी हुन् ।
यसअघि १३ असोजमा रोशनीले आफूमाथि यौन दुराचार भएको भन्दै गर्दै विभिन्न सञ्चारमाध्यममा बयान दिएकी थिइन् । तर, भोलीपल्ट महराको राजीनामा आएसँगै उनले बयान फेरेकी थिइन् । श्रीमान्सँग छलफलपछि मात्र के गर्ने निष्कर्षमा पुग्ने बताएकी उनले स्वास्थ्य परीक्षण गर्न पनि मानेकी थिइनन् । पछिल्लो समय ‘आफू डिप्रेसनको शिकार भएको र के बोलेँ थाहा नभएको’ भन्दै निवेदन समेत दिएकी थिइन् ।
यद्यपि प्रहरीले घटनास्थलबाट रक्सीका बोतल, फुटेका चस्मा लगायतका सामग्री बरामद गरेको थियो । अब पीडित महिलाले जाहेरी दिएसँगै अनुसन्धान अघि बढाउन प्रहरीलाई सहज भएको छ ।
कल डिटेल रेकर्ड (सीडीआर), सीसी टीभी फुटेज र अन्य प्राविधि पक्षको विश्लेषणले महरा घटनास्थलमा पुगेको पुष्टि भइसकेको प्रहरी दाबी छ ।
महराविरुद्ध पीडित महिलाले आरोप लगाएपछि उनलाई पक्राउ गर्न चौतर्फी दबाब बढेको छ । राष्ट्रिय मानवअधिकार आयोगले यस विषयमा प्रहरीसँग जानकारी मागेको छ भने शुक्रबार मात्रै अन्तराष्ट्रिय समुदायले पनि संयुक्त वक्तव्य जारी गर्दै महरा प्रकरणबारे उल्लेख नगरी यौन हिंसाका घटनाहरुको निश्पक्ष छानविन गर्न माग गरेका थिए ।
उजुरी नपरेका कारण अनुसन्धान अघि बढाउन नसकिएको बताउँदै आएको प्रहरीले महराविरुद्ध उजुरी परेसँगै उनलाई पक्राउ गर्ने सम्भावना बढेको छ।
