काठमाडौँ । नेकपा (मसाल) का प्रवक्ता रामप्रकाश पुरीले आफ्नो पार्टीले राष्ट्रियता, सार्वभौमिकता र अखण्डतालाई केन्द्रमा राखेर सङ्घीयताको विरोध गरेको बताउनुभएको छ ।
राष्ट्रिय जनमोर्चा काठमाडौँको आयोजनामा आज माइतीघर मण्डलामा आयोजित विरोधसभालाई सम्बोधन गर्दै उहाँले यस्तो अभिव्यक्ति दिनुभएको हो ।
त्यस क्रममा उहाँले भन्नुभयो– ‘हाम्रो पार्टीले देशको राष्ट्रियता, सार्वभौमिकता र अखण्डतालाई केन्द्रमा राखेर सङ्घीयताको विरोध गरेको हो ।’ ‘हामीले सत्ताका लागि सङ्घीयताको विरोध गरेका होइनौँ’ प्रवक्ता पुरीले भन्नुभयो– ‘सङ्घीयताले राष्ट्रियता, सार्वभौमिकता कमजोर हुन्छ; भौगोलिक अखण्डतामाथि आँच पुग्छ; जातजातिमाझको सद्भावमा विग्रह आउँछ, देश आर्थिक रूपमा पतन हुन्छ । त्यसैले हामीले सङ्घीयताको विरोध गरेका हौँ ।’
सङ्घीयता सेतो हात्ती भएको बताउँदै उहाँले भन्नुभयो– ‘जनतामाथि करको बोझ लादेर र युवाजतिलाई विदेश धपाएर अहिले देशमा सङ्घीयतारूपी आठ वटा सेतो हात्ती पालिएको छ ।’ सम्बोधनको क्रममा उहाँले सङ्घीयताले स्थानीयस्तरमा मुखिया, जिम्माल, राजारजौटा प्रवृत्ति उत्पादन गर्दै गइरहेकोसमेत बताउनुभयो ।
चौतर्फी रूपमा सङ्घीयताको विरोधमा आवाज उठ्दै गइरहेको वर्तमान अवस्थामा सङ्घीयतालाई खारेज नगरे देशै समाप्त हुने चेतावनी पनि उहाँले दिनुभयो ।
अहिले पुनरुत्थानवादीहरूको चलखेल बढ्दै गइरहेको बताउँदै उहाँले आफ्नो पार्टी गणतन्त्र र धर्म निरपेक्षताको रक्षाको पक्षमा रहेको बताउनुभयो । त्यस्तै, उहाँले एमसिसी स्वीकार गरिएमा त्यसबाट देशको असंलग्नतासहितको स्वतन्त्र परराष्ट्र नीति समाप्त हुने दावी गर्दै कुनै पनि हालतमा एमसिसी पारित नगर्न सरकारसित आग्रह गर्नुभयो ।
विरोधसभामा मन्तव्य राख्दै अखिल नेपाल किसान महासङ्घका अध्यक्ष भैरवराज रेग्मीले सङ्घीयताबाट जनता आत्तिएको बताउनुभयो । ‘अब सङ्घीयता खारेज गर्ने बेला आयो’ रेग्मीले भन्नुभयो– ‘जनता आत्तिएका छन्, स्वयम् सत्तारूढ दलकै नेता–कार्यकर्ता सङ्घीयताको विरोधमा उभिइरहेका छन् । अब सङ्घीयताको विरोधमा देशव्यापी आन्दोलन अगाडि बढाउनुपर्दछ ।’
अध्यक्ष रेग्मीले भारतले सडक निर्माण गर्दै लिम्पियाधुरादेखि लिपुलेकसम्मको सीमा अतिक्रमण गरिरहेकोमा सरकार बोल्न नसकेको बताउनुभयो । त्यस्तै, विदेशस्थित अलपत्र नेपाली नागरिकलाई स्वदेश फिर्ता ल्याउन नसकेकोमा पनि उहाँले सरकारको आलोचना गर्नुभयो ।
राष्ट्रिय जनमोर्चाका केन्द्रीय सदस्य तथा गण्डकी प्रदेशकी सांसद पियारी थापाले पछिल्लो समयमा महिलामाथिको हत्या, हिंसा, बलात्कारजस्ता जघन्य अपराध बढ्दै गएकोमा चिन्ता व्यक्त गर्नुभयो । उहाँले महिलामाथिका यस्ता जघन्य अपराधको जिम्मेवारी सरकारले लिनुपर्ने बताउँदै त्यसका विरुद्ध गम्भीर कदम उठाउन माग गर्नुभयो ।
राष्ट्रिय जनमोर्चाका केन्द्रीय सदस्य तथा बागमती प्रदेश अध्यक्ष लालबहादुर थापाले समेत मन्तव्य राख्नुभएको सो कार्यक्रमको अध्यक्षता राजमो काठमाडौँका उपाध्यक्ष राजेन्द्र पुडासैनीले र सञ्चालन राजमो काठमाडौँका लक्ष्मणदेव पाण्डेले गर्नुभएको थियो ।
कार्यक्रमभन्दा अगाडि सङ्घीयताको खारेजी, कोरोना सङ्क्रमितको निःशुल्क परीक्षण र उपचार, स्वास्थ्य सामग्रीमा भ्रष्टाचारको छानबिन, एमसिसीको खारेजी, अतिक्रमित लिम्पियाधुरा–लिपुलेक भूमि फिर्ता, भारतसितका असमान सन्धिसम्झौताको खारेजीलगायतका विषयमा नारा लगाइएको थियो ।
कार्यक्रममा काठमाडौँ, ललितपुर र भक्तपुरमा ठुलो सङ्ख्यामा राजमोका नेता, कार्यकर्ता र समर्थकको उपस्थिति रहेको थियो ।
