पोखरा । राष्ट्रिय जनमोर्चाका अध्यक्ष चित्रबहादुर केसीले भ्रष्टाचारका ठुला ठुला काण्डमा अहिलेका सत्तापक्ष र पहिलेका सत्तापक्षबीच मिलिभगत रहेको बताउनुभएको छ ।
बुधबार पोखरामा आयोजित जनसभालाई सम्बोधन गर्दै अध्यक्ष केसीले सत्तापक्षले भ्रष्टाचार र अनियमितता गर्दा प्रतिपक्ष चुप लाग्नुको कारण उनीहरुको समेत मिलेमतो रहेको आरोप लगाउनुभयो ।
‘अहिले महंगी बढिरहेको छ, भ्राष्टाचार भैरहेको छ, तस्करी भैरहेको छ । विदेशीहरुले लगातार हस्तक्षेप बढाईराखेका छन्’ केसीले प्रश्न गर्नुभयो, ‘ प्रतिपक्ष कहाँ छन् ? कुरा जस्तो कुरा गरे चित्त फाट्ने, नाच जस्तो नाचौँ भने घाँगरी फाट्ने ।’
अध्यक्ष केसीले वाइडवडी काण्ड, आयल निगमको जग्गा खरिद, एनसेलको भ्रष्टाचार लगायत ठुला काण्डहरुमा प्रतिपक्षको मिलेमतो रहेकाले सडकमा आउन नसकेको दाबी गर्नुभयो । उहाँले भ्रष्टाचारका नाममा सामान्य खरदार सुब्बा, पियुन र प्रहरीका हवल्दारहरुलाई समात्ने गरिएको भन्दै सत्ता बस्नेहरु नै ललिता निवासको जग्गा हडप्न लागिपरेको बताउनुभयो ।
‘राष्ट्रियता, गणतन्त्र र धर्म निरपेअक्षताको रक्षा गरौं’ भन्ने मुल नाराका साथ राष्ट्रिय जनमोर्चाले देशका विभिन्न भागमा आयोजना गरेको प्रदर्शनका क्रममा बुधबार पोखरामा जनसभाको आयोजना गरेको हो ।
यसअघि शुक्रबार काठमाडौं, बुटवल, धनगढी, र सुर्खेतमा जनसभा सम्पन्न भइसकेका छन् । राजमोले २०७६ सालभरी नै विभिन्न संघर्षका कार्यक्रमको घोषणा गरेको छ ।
भिडियो हेर्न यहाँ क्लिक गर्नुहोस्
