डम्मरबहादुर कार्की, काठमाडौँ ।
राष्ट्रिय जनमोर्चाका अध्यक्ष चित्रबहादुर केसीले नेपालमा बाह्य शक्तिको हस्तक्षेप डरलाग्दो गरी बढेको बताउनुभएको छ ।
शुक्रबार राजमोले बाराको सिमरामा आयोजना गरेको जनसभालाई सम्बोधन गर्दै अध्यक्षकेसीले नेपालको शासन सञ्चालन नेपालीले नै गरेपनि उनीहरु बाह्य शक्तिबाट प्रभावित हुने गरेको बताउनुभयो ।
‘तपाईंले सत्तामा बस्नेहरुलाई लवेदा सुरुवाल लगाएकै देख्नुहुन्छ । ढाकाटोपी लगाएकै देख्नुहुन्छ ।’ केसीले भन्नुभयो, तर, उनीहरुको काम भनेको बाह्य शक्तिले के भन्छ, त्यसको आदेश पालना गर्ने हो ।’
आफ्नो ब्यक्तिगत स्वार्थका लागि विदेशीको निर्देशन र हस्तक्षेपसमेत स्विकार गर्ने प्रवृति बढ्दै गएकोमा केसीले चिन्ता ब्यक्त गर्नुभयो । राजनीति गर्नेले जनता र राष्ट्रका लागि भन्दा पनि आफू र आफ्ना सन्तानका लागि सम्पत्ति थुपार्ने गरेको उहाँले बताउनुभयो ।
अध्यक्ष केसीले संघीयताको भारी बोक्नेहरुले यसलाई पार लगाउन सकिन्छ भनेर सोच्दै नसोचेको दाबी गर्नुभयो । बाह्य शक्तिका आडमा लागू भएको संघीयताले देश पार नलाग्ने केसीको भनाई थियो ।
संघीयता लागू गरेपछि केही टाठाबाठालाई समाजवाद आएको उल्लेख गर्दै केसीले जनतालाई झन् बढी महंगी, भ्रष्टचार र कुशासनले घेरेको र राष्ट्रियतामाथि झन् खतरा उत्पनन हुँदै गएको बताउनुभयो ।
भिडियो हेर्न यहाँ क्लिक गर्नुहोस्
राष्ट्रिय जनमोर्चा २ नं.प्रदेशका कोषाध्यक्ष शेर बहादुर कार्कीको सञ्चालन र उपाध्यक्ष चिन्तामणी पौडेलको अध्यक्षतामा सम्पन्न कार्यक्रममा राजमोका केन्द्रीय सचिव हिमलाल पुरी, सदस्य कर्ण थापा, अखिल नेपाल युवक सङ्घका केन्द्रीय अध्यक्ष अखिल किशोर घिमिरे, नेकपा (मसाल)का बारा जिल्ला प्रवक्ता रमेश भट्टराई, राजमो पर्सा जिल्ला अध्यक्ष नेत्र पौडेल,राजमो रौतहटका सचिव नवराज पौडेल, तराई मधेश जनवादी मोर्चाका उपाध्यक्ष दिपक चौधरी, अखिल नेपाल महिला संघकी बारा जिल्ला अध्यक्ष सुमित्रा सापकोटा, तराई मधेश जनवादी मोर्चाका २ नं. प्रदेश संयोजक अक्षलाल शाह, रक्तिम साँस्कृतिक परिवारका अध्यक्ष जिवन भट्टराई, राजमो बारा अध्यक्ष बालकृष्ण आर्चाय, अखिल नेपाल कानुन व्यवसायी संघका केन्द्रीय सदस्य टिका थापा, अखिल नेपाल शिक्षक संघका केन्द्रीय सदस्य हरि सापकोटा, राजमो रौतहटका शेख सलाउदिनलगायतले सम्बोधन गर्नुभएको थियो ।
कार्यक्रममा अखिल नेपाल किसान संघका केन्द्रीय सदस्य, जितपुर सिमरा नगर अध्यक्ष तथा कार्यक्रम व्यवस्थापन समितिका संयोजक धर्मानन्द सुवेदीले स्वागत मन्तब्य दिनुभएको थियो । कार्यक्रमको विच विचमा रक्तिम साँस्कृतिक परिवारद्वारा जनवादी गित तथा नित्य प्रस्तुत गरेका थिए ।
राष्ट्रिय जनमोर्चाले संघीयताको विरोध, महंगी र भ्रष्टाचार विरुद्ध पाँचवटा प्रदेशमा शुक्रबार जनसभा आयोजना गरेको हो । काठमाडौंमा आयोजित सभालाई राजमोका कार्यकारी अध्यक्ष रश्मीराज नेपाली, बुटवलमा उपाध्यक्ष दुर्गा पौडेल, धनगढीमा महासचिव जनकराज शर्मा र सुर्खेतमा केन्द्रीय सदस्य मनोज भट्टले सम्बोधन गर्नुभएको थियो ।
