काठमाडौँ । युगदर्शन साप्ताहिकका कार्यकारी सम्पादक प्रकाश थापा मगरको तेस्रो कृति ‘नेपाली राज्यसत्ताको चरित्रः एक बहस’ हालै प्रकाशित भएको छ ।
सोह्र अध्यायमा बाँडिएको सो पुस्तकको पहिलो अध्यायमा राज्य र राज्यसत्तासम्बन्धी सैद्धान्तिक प्रस्थापनाबारे चर्चा गरिएको छ भने दोस्रो अध्यायमा समाज विकासको सामान्य प्रवृत्तिबारे उल्लेख गरिएको छ । त्यस्तै, तेस्रो अध्यायमा पुँजीवादी विकासका केही अन्तर्राष्ट्रिय सन्दर्भबारे, चौँथो अध्यायमा नेपाली राज्यसत्ता र छिमेकीको सन्दर्भबारे र पाँचौँ अध्यायमा नेपाली राज्यसत्ताको इतिहासबाट केही प्रसङ्ग उठाइएको छ ।
अध्याय छ मा नेकपाको स्थापनाकालतिर नेपाली राज्यसत्ताको चरित्र अर्धसामन्ती तथा अर्धऔपनिवेशिक चरित्र भएको विश्लेषणबारे चर्चा गरिएको छ । सातौँ अध्यायमा नेपाली समाजको चरित्र पुँजीवाद भएकोबारे तथा आठौँ अध्यायमा राज्यको चरित्र पुँजीवादभन्दा फरक रहेको धारणाबारे छलफल चलाइएको छ । नवौँ अध्यायमा भूमि, कृषि र बसाइँसराइबारे र दशौँ अध्यायमा औद्योगिक तथा वित्तीय क्षेत्रबारे परिचर्चा गरिएको छ ।
अध्याय एघारमा नेपाली श्रमशक्तिको विदेश पलायनबारे, अध्याय बाह्रमा अर्थतन्त्रका अन्य क्षेत्रबारे, अध्याय तेह्रमा सामाजिक क्षेत्रको बारेमा तथा अध्याय चौधमा प्रभावशाली सामन्ती अवशेषबारे चर्चा गरिएको छ ।
पन्ध्रौँ अध्यायमा अर्धसामन्ती तथा अर्धऔपनिवेशिक अवधारणाको पक्षमा तर्क प्रस्तुत गरिएको छ । अन्तिम सोह्रौँ अध्यायमा पुस्तकको सामान्य निस्कर्ष दिइएको छ ।
रामबहादुर बुढाको भूमिका रहेको सो पुस्तक २४० पृष्ठको रहेको छ भने मूल्य २७५ रुपियाँ राखिएको छ । पुस्तकको प्रकाशक चन्द्रा श्रीस रहनुभएको छ ।
प्रगतिशील पत्रकार संघका केन्द्रीय सदस्य तथा प्रगतिशील लेखक संघका केन्द्रीय सचिव थापाका यसअघि ‘देशविहीनहरु (कथा संग्रह), ‘सहकारी सम्बन्धी सर्वहारा समझदारी’ कृति प्रकाशन हुनुका साथै पत्रपत्रिकामा सयभन्दा बढी फुटकर लेख रचनाहरु प्रकाशित छन् ।
