टेकराज भुसाल, रुपन्देही ।
रुपन्देहीमा क्रियाशील अनेरास्ववियु (छैठौं) लगायत तीन विद्यार्थी संगठनले अनलाईन कक्षाका नाममा लिइएको शुल्क फिर्ता गर्न विद्यालयहरुलाई चेतावनी दिएका छन् ।
अनेरास्ववियु (छैठौं), नेपाल विद्यार्थी संघ र अनेरास्ववियू जिल्ला समिति रुपन्देहीको मंगलबार बसेको संयुक्त बैठकले महामारीका कारण बन्द रहेका निजी स्कुलहरुले विद्यार्थीसँग अनलाइन पढाइको नाममा शुल्क असुल गरेका भन्दै फिर्ता गराउन दबाब दिने निर्णय गरेको हो ।
विद्यार्थी संगठनहरुले असुली गरेको रकम फिर्ता गरि हालसम्मको कुनै पनि रकम असुली नगर्न चेतावनी दिएका छन् ।
यस्तै, उनीहरुले कोभिड–१९ को विषम परिस्थितिका कारण सामुदायिक विद्यालयमा अध्यनरत विद्यार्थीहरुको पढाइ अस्तव्यस्त भएको भन्दै समबन्धित निकायको ध्यानकर्षण गराएका छन् ।
अखिल (छैठौं) का केन्द्रीय सदस्य पुरन पोखरेलका अनुसार संयुक्त विद्यार्थी संघर्ष समितिले निजी विद्यालयमा कार्यरत शिक्षक तथा कर्मचारीहरुलाई आधारभुत पारिश्रमिक दिन माग गर्दै विद्यार्थीहरुलाई दिँदै आएको छात्रवृत्तिको विवरण पूर्ण रुपमा पारदर्शि बनाउन माग गरिएको छ ।
रुपन्देहीमा सञ्चालित सामुदायिक तथा निजी शैक्षिक संस्थाहरुले जारी गरेको विद्यार्थी सिकाइ सहजिकरण निर्देशिका २०७७ बमोजिम अध्ययन अध्यापन गर्न गराउन सबै पक्षको ध्यानाकर्षण गराउँदै संघर्ष समितिले उल्लेखित मागहरुको सुनुवाइ नगरे विद्यालयमा तालाबन्दी लगायतका आन्दोलन गर्ने समेत चेतावनी दिएका छन् ।
