किरण पाण्डे, काठमाडौँ ।
अख्तियार दुरुपयोग अनुसन्धान आयोगले भुठा विवरण पेस गरी लाखौँ रकम ठगी गरेको आरोपमा पक्राउ परेका दुई अधिकृत विरुद्ध विशेष अदालतमा मुद्दा दायर गरेको छ ।
बुधबार भोजपुर जिल्लाको षडानन्द नगरपालिकाका तत्कालीन निमित्त प्रमुख प्रशासकीय अधिकृत चन्द्र बहादुर कार्की र तत्कालीन लेखा अधिकृत राजेश काफ्ले उपर आरोप–पत्र दायर गरिएको हो।
अधिकृतद्वय कार्की र काफ्लेले कार्यालयको लेटरप्याड, छाप र चेकसमेत साथमा लगेर विभिन्न योजनाहरूको भुक्तानी गरेको साथै आफू अनुकूलका व्यापारीहरूसँग साँठगाँठ गरी निजहरूको मिलेमतोमा विभिन्न सामानहरू खरिद गरी भुक्तानी गरेको अख्तियारको ठहर छ ।
निमित्त प्रमुख प्रशासकीय अधिकृत कार्कीले झुठ्ठा बिवरण पेश गरी भ्रमण प्रतिवेदन समेत पेश नगरी एक लाख ३३ हजार पाँच सय ६८ रुपैयाँ र कार्यालयमा प्राप्त नभएको मालसामानहरूलाई कार्यालयको जिन्सी आम्दानी खाताहरूमा प्रविष्ट नगराई आफूले नै झुठ्ठा खरिद आदेश र झुठ्ठा दाखिला रिपोर्ट तयार गरी १५ लाख २३ हजार तीन सय १८ रुपैयाँ भुक्तानी गरी जम्मा रू १६लाख ५६ हजार नौ सय चार रूपैयाँ सत्र पैसा हानी नोक्सानी गरेको अख्तियारले जनाएको छ ।
यस्तै, तत्कालीन लेखा अधिकृत राजेश काफ्लेले झुठ्ठा विवरण पेश गरी भ्रमण प्रतिवेदन समेत पेश नगरी बढी रकम भुक्तानी लिएको तथा आवश्यक कानूनी प्रकृया पूरा नगरी भौचर खडा गरी भुक्तानी लिएको रकम रू।२लाख ८१ हजार सात सय ५० र कार्यालयमा प्राप्त नभएको मालसामानहरूलाई कार्यालयको जिन्सी आम्दानी खाताहरूमा प्रविष्ट नगराई अफूले नै झुठ्ठा खरिद आदेश र झुठ्ठा दाखिला रिपोर्ट तयार गरी १५ लाख २३ हजार तीन सय १८ रुपैयाँ १७ पैसा भुक्तानी गरी जम्मा रू १८ लाख ५ हजार ६८ रूपैयाँ सत्र पैसा नगरपालिकालाई हानिनोक्सानी गरेको अख्तियारले जनाएको छ ।
अधिकृतद्वयलाई हानिनोक्सानी गरेको विगो असुलउपर हुन मागदावी लिई बुधबार विशेष अदालत काठमाडौंमा आरोप–पत्र दायर गरिएको छ ।
