पोखरा । कास्कीमा औषधी पसलका आवरणमा प्रतिबन्धित लागुऔषको कारोबार हुने गरेको फेला परेको छ । औषधी बिक्री गर्ने पसलबाटै ठुलो परिमाणमा लागुऔषधी बरामद भएपछि अवैध कारोबार पुष्टि भएको हो ।
पोखरा महानगरपालिका–२६ कालिकाचोकस्थित जलधारे औषधी पसलका सञ्चालक २९ वर्षीया अमिसा ढुङ्गानालाई प्रहरीले लागुऔषधका चक्कीसहित पक्राउ गरेको छ ।
जिल्ला प्रहरी कार्यालय कास्कीका सूचना अधिकारीसमेत रहेका प्रहरी नायब उपरीक्षक वीरेन्द्रकुमार पासवानका अनुसार लागुऔषध ओसारपसार भइरहेको सूचनाका आधारमा इलाका प्रहरी कार्यालय शिशुवाबाट खटिएको प्रहरी टोलीले औषधी पसलमा जाँच गरेको थियो । सो क्रममा विभिन्न चार प्रकारका लागुऔषध सञ्चालिकाको साथबाट बरामद गरिएको थियो ।
प्रहरीका अनुसार औषधी पसल सञ्चालिका ढुङ्गानाका साथबाट कोडिप–पी (कोडिन) छ हजार चार सय चक्की, प्रेगाबालिन चार सय ५० चक्की, लोराजेपाम एक सय ५० चक्की र क्लोर्डियाजेपोक्साइड एक सय ६० चक्की बरामद गरिएको छ ।
‘लागुऔषधको कारोबार भइरहेको भन्ने विशेष सूचनाका आधारमा फार्मेसीमा छापा मारेका थियौँ । सोही क्रममा ठुलो परिणामको लागुऔषध फेला पर्यो । औषधी बिक्री तथा वितरणका लागि सञ्चालनमा रहेका फार्मेसीबाटै लागुऔषधजन्य औषधी ठुलो परिमाणमा बरामद हुनुले औषधीको बिक्री, वितरण र प्रयोगको नियमन तथा अनुगमन प्रभावकारी हुनुपर्ने आवश्यकतालाई उजागर गरेको छ’ प्रनाउ पासवानले भने ।
पक्राउ परेकी औषधी पसलका सञ्चालिकामाथि लागुऔषधसम्बन्धी कसुरमा थप अनुसन्धान प्रक्रिया अघि बढाइएको प्रहरीले जनाएको छ ।
पोखरामा यसअघि पनि विभिन्न समयमा फार्मेसीबाटनै लागुऔषधको कारोबार हुने गरेको फेला परेको थियो । प्रहरीले त्यस्ता औषधी पसल सञ्चालकलाई नियन्त्रणमा लिएर कानुनी कारवाही अघि बढाउने गरेको थियो । (रासस)
