बेनी । म्याग्दीको बेनी नगरपालिका–९ ढोल्ठानमा स्वयम्सेवकहरूले श्रमदान गरेर पहिरो प्रभावितका लागि अस्थायी आवास निर्माण गरेका छन् ।
असोज ८ देखि ११ गतेसम्म परेको अविरल वर्षापछि गएको पहिरोबाट बगेका ढोल्ठानका रामचन्द्र परियार र रेखा दर्जीको घर बनाइएको हो ।
घर गुमाएर समस्यामा परेका दुवै परिवारका लागि साहारा समूहका स्वयम्सेवकको श्रमदान र स्थानीयवासीको सहयोगमा अस्थायी आवास निर्माण गरिएको छ ।
साहारा समूहका संयोजक प्रकाश पौडेलले दिवाकर गोल्छा फाउन्डेसनले उपलब्ध गराएको जस्तापाताले छाएर काठ र ढुङ्गामाटोको प्रयोग गरेर दुइटा घर निर्माण गरेको बताए । घरनिर्माणका लागि काठजन्य सामग्री स्थानीयवासीले सहयोग गरेका थिए ।
समूहका १५ जना युवाले १० दिनसम्म श्रमदान गरेर अस्थायी आवास बनाएका हुन् । बिपद्का कारण घरबारविहीन भएका परिवारलाई तत्काल बसोबासको व्यवस्था मिलाउने उद्देश्यले आवास निर्माण गरिएको उनले बताए ।
त्यसैगरी बाढीपहिरोबाट प्रभावित अन्य परिवारलाई समेत सहयोग गर्ने उद्देश्यले म्याग्दीको मङ्गला गाउँपालिकामा पनि थप अस्थायी आवास निर्माणको काम अघि बढाइएको संयोजक पौडेलले बताए ।
