राँझा (बाँके) । पछिल्लो केही दिनयता गाँउघरमा बडादशैँको चहलपहल र उल्लास बढेको छ । प्रत्येक घरआँगन सरसफाइ र रङरोगन गरी चिटिक्क पारिएको छ । वर्षभरि टाढा रहेका आफन्त मान्यजनको हातबाट टिका र जमरा थाप्न गाउँघर फर्किरहेका छन् ।

नेपालगञ्ज–२० मनिकापुर थपुवाका १६ वर्षीय सुभास नेपाली, उनका ११ वर्षीय भाइ अश्विन र नौ वर्षीया बहिनी स्मारिकाका लागि भने यस वर्षको बडादशैँ खुसी होइन, आँसु र पिरलो बोकेर आएको छ ।
आमाबुबा आराम दमाईं र उजना दमाईं भोटेकोशीको बाढीमा बेपत्ता भएको आज ५० दिन पुगिसकेको छ । सबैका घरमा आमाबुबाको

हातबाट टिका लगाउने र मीठोमसिनो खाने चटारो हुँदा ती तीन कलिला बालबालिका भने आमाबुबा फर्किने आशा र निराशामा दिन बिताइरहेका छन् ।

‘आमाबुबा फर्किएर आउने आशामा बसेको दुई महिना हुन लाग्यो, केही अत्तोपत्तो भएन । दशैँ आयो, आमाबुबा आउनुभएन’ जेठा छोरा सुभासले भक्कानिँदै भने– ‘बाढीले आमाबुबालाई बेपत्ता बनाएपछि हामी पूरै सहाराविहीन भयौँ । दशैँ आउँदा आमाबुबाको झन धेरै यादले सताइरहेको छ ।’

नेपालीको पर्व बडादशैँ घरआँगनमा आइपुगेको छ तर बाढीमा परी बेपत्ता आराम दमाईं र उजना दमाईं हालसम्म पनि नफर्किदा सहाराविहीन उहाँका छोराछोरीमा निराश छन् ।

मूल थलो बाजुराको हिमाली गाउँपालिकाबाट नेपालगञ्जको मनिकापुरस्थित थपुवामा बसाइँ सरेका आराम दमाईं र उजना दमाईंका लागि हन्डर र सङ्घर्ष नयाँ कुरा थिएनन् तर आफ्ना सन्तानले आफूले जस्तै अभाव र दु:ख भोग्नुनपरोस् भनेर उनले एउटा ठुलो र सुन्दर सपना बुनेका थिए, छोराछोरीलाई काठमाडौँमा राखेर राम्रो शिक्षा दिने ।

नेपालगञ्जमा सोचेजस्तो रोजगारी नपाएपछि यो दम्पती रसुवा भन्सार कार्यालयको टिमुरेस्थित पार्किङमा मजदुरी गर्न पुगेको थियो । दिनरात पसिना बगाएर कमाएको रकमले काठमाडौँमा कक्षा ९ मा पढ्ने सुभास, कक्षा ६ मा पढ्ने अश्विन र कक्षा ४ मा पढ्ने सानी बहिनी स्मारिकाको उज्ज्वल भविष्यको जग बसिरहेको थियो ।

‘आमाबुबाले रसुवाबाट दु:ख गरेर पैसा पठाइदिनुहुन्थ्यो, हामी यहाँ ढुक्कले पढ्थ्यौँ’ छोरा सुभासले भने– ‘अहिले बाढीले दुवै जनालाई बेपत्ता बनाएको छ, हामी सहाराविहीन भयौँ । अब हाम्रो टाउकोमा हात राख्ने कोही छैन ।’

यो शोक केवल एउटा घरमा मात्र सीमित छैन, उक्त बाढीमा परी थपुवा गाउँका शेरसिंह रोकाय, विष्ण्ॉमती रोकाय र दीपक रोकाय पनि बेपत्ता छन् ।

नेपालगञ्ज उपमहानगरपालिका–२० कार्यवाहक वडाध्यक्ष चक्रबहादुर बुढाले बेपत्ता व्यक्तिको खोजीकार्य र बेपत्ता व्यक्तिका परिवारलाई आवश्यक सहयोग र समन्वयका लागि आफूहरूले काम गर्दै आएको जानकारी दिए ।

बाँकेका प्रमुख जिल्ला अधिकारी दिलकुमार तामाङका अनुसार रसुवाबाढीपछि बाँकेका २३ व्यक्ति हालसम्म पनि बेपत्ता छन् ।