काठमाडौँ । गोरखाको बुढीगण्डकी नदीको माथिल्लो क्षेत्रमा सुक्खा पहिरोका कारण बहाव थुनिएको र खुलेपछि लेदोसहितको आकस्मिक बाढी नेपाली सेनाले जानकारी दिएको छ ।
सेनाका अधिकारीका अनुसार आइतबार बिहान गोरखाको चुमनुब्री गाउँपालिका–३ स्थित बुढीगण्डकी नदी पहिरोका कारण थुनिएको र थुनिएको भाग खुलेपछि लेदोसहितको बाढी आएको हो ।
श्री नम्बर ३ बाहिनी अड्डालाई बिहान ५:५५ बजे बुढीगण्डकी नदी थुनिएको प्रारम्भिक जानकारी प्राप्त भएको थियो । त्यसपछि गोरखा जिल्लामा तैनाथ रुद्रध्वज गण, सुरक्षा पोस्ट बाङसिङबाट ६:१५ बजे रेकी टोली खटिएको थियो । सोही टोलीले चुमनुब्री गाउँपालिका–३ फिलिम भन्ने स्थानमा सुक्खा पहिरो गएको यकिन गरेको थियो ।
सेनाको सोही रिपोर्टिङको आधारमा हालसम्म सोही सुक्खा पहिरोका कारण बहाव बन्द भएको र पछि खुलेर बाढी आएको प्रारम्भिक अनुमान गरिएको छ ।
राष्ट्रिय बिपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख डा. धर्मराज उप्रेतीका अनुसार गत भदौ १० गते आएको रसुवा–भोटेकोशी बाढी र अहिलेको बुढीगण्डकी बाढीको प्रकृति हेर्दा उस्तै खालको देखिएको बताउँछन् तर बाढीको उद्गम भने अझै अस्पष्ट छ ।
भिडियो फुटेजमा बुढीगण्डकीमा लेदो माटो र गेग्रानसहितको कालो बाढी आएको देखिन्छ । बुढीगण्डकीमा बाढीको यकिन कारण पत्ता लगाउने प्रयास भइरहेको उनले बताए ।
‘हाम्रो टोली ड्रोनसहित बुढीगण्डकीको माथिल्लो क्षेत्रमा परिचालित भएको छ’ डा. उप्रेतीले भने ।
